بص بقى، أنا عارف إنك عامل تفتح كل خبر يعدي عليك عنوانه "5 قنوات مش عارف فين هتذيع كاس العالم مجانًا"، عمومًا الأخبار دي صحيحة، في قنوات فعلًا أعلنت إنها هتذيع كاس العالم مجانًا، أو بمعنى أصح هتسرق شارة البث يعني. خد بالك بس إن الحاجات دي مش مضمونة خالص، ومش كل القنوات اللي بتعلن بتبقى قادرة إنها تجيب شارة البث، غير القنوات اللي بتنجح فعلًا إنها تذيع بس بتذيع أرضي مش فضائي، من الآخر ماتعتمدش على الكلام ده. لو عاوز تتفرج على كاس العالم بشكل مضمون وأمان، محتاج حاجة واحدة بس: انترنت سرعته كويسة، الباقي سهل.

لو عاوز تتفرج على لاب توب:

أول حاجة ماتعتمدش على مواقع مشاهدة عربية عشان بيكون عليها ضغط وفيها مشاكل كتير. في 2 ويب سايت بيجيبوا لينكات كتير جدًا لكل ماتش، وده بيخليك تقدر تتشقلب بين اللينكات لغاية ما توصل للينك لطيف مش بيقطع ومناسب لسرعتك.

1- Ronaldo7.net

2- ifirstrow.eu

الاتنين دول تقدر تستخدمهم في كل الماتشات عمومًا مش لكاس العالم بس ومش هيخذلوك أبدًا. في أبلكيشنز تانية للديسك توب واللاب توب، أشهرهم "هيين" و"الإمبراطورية"، والاتنين دول بيفتحولك كل قنوات بين سبورت على اللاب توب، بس حاليًا التفعيلات اللي بتفتحلك القنوات متعطلة وعليها ضغط كبير جدًا ولازم تأمن نفسك بمصادر تانية غيرهم، عشان كده الإنجلش هيكون حل مناسب ومضمون.

لو عاوز تتفرج من الموبايل:

وده مهم جدًا عشان كمان لو عاوز تتفرج وأنت في شغلك أو بره البيت. في أبلكيشنز كتير جدًا ممكن تحملها على موبايلك وبتفتحلك قنوات الماتشات، غير إن اللينكين اللي فوق دول في منهم حاجات بتشتغل على الموبايل. نرجع للأبلكيشينز:

1- موبي كورة: أبلكيشن مصري وبينقل كل الماتشات، بس محتاج سرعة عالية شوية أو تتفرج على جودة 240p وتبوس إيدك وش وضهر. كمان مشكلة موبي كورة إنه متأخر شوية، يعني الجول يدخل وهتسمع الناس بتحتفل بيه في القهوة، بس هيوصلك أنت بعد دقيقتين مثلًا. نسيت أقولك كمان إنه للأندرويد، عشان الأيفون ابن ناس وبيزنق على الأبلكيشنز اللي من النوع ده

2- Mobdro: أبلكيشن عظيم وبيفتحلك قنوات كتير أجنبية وعربية سواء في الرياضة أو غير الرياضة وتقدر تحمله أندرويد أو أيفون، غير كمان إن البث فيه مش متأخر.

3- RedBoxTV: من أحسن الأبلكيشنز الموجودة في المجال ده، مشكلته برضه إنه أندرويد بس، غالبًا بتوع الأيفون هيستخدموا اللينكات بتاعت المواقع وخلاص

4- Swift Streamz: أبلكيشن كويس برضه، فيه شبه كبير من اللي قبله، بس الفكرة إنك لازم يكون معاك أكتر من أوبشن دايمًا تقلب فيهم.