رئيس مجلس إدارة شركة «هايبرلوب لتقنية النقل - الإمارات»، بيبوب غريستا، قال إن قريب هيتم تشغيل أول خط لـ"هايبرلوب" في العالم واللي هيكون في الإمارات، وهيمتد على 10 كيلو متر كمرحلة أولى وهيوصل ما بين أبو ظبي ودبي، ومن ناحيتها قالت هيئة الطرق والمواصلات في دبي، إنها بتسعى دايمًا لتوفير وسائل نقل متطورة، زي «هايبرلوب» و«التاكسي الجوي»، عشان يوفروا رفاهية وخدمات إضافية للمواطنين، وإن الوسائل دي مش هتستبدل الوسائل التقليدية لكن هتكملها.

"الهايبرلوب" ده بيطلق عليه "الترام الهوائي" وهو عبارة عن أنابيب منخفضة الضغط ومافيش فيها هوا، بتتعمل عشان تربط بين محطتين، وجوا الأنابيب دي بتكون في كبسولات بتشيل الركاب وتجري بسرعة عالية جدًا بدون احتكاك في جدار الأنبوب، وسرعته العالية دي هتخليه يروح من دبي لأبو ظبي في 12 دقيقة. كمان المواصلة تعتبر صديقة للبيئة وبتستخدم الطاقة الشمسية وتكلفته قليلة.

الخط ده هيكون الأول من نوعه في العالم، وبعد كده هيتعمل في مدن تانية في المنطقة وفي العالم كله. قناة العربية كانت عملت فيديو تشرح فيه بالظبط تقنية الـ"هايبرلوب" وازاي بتستخدم في النقل.