المغني والمنشد الديني طارق فؤاد، عمل لقاء على قناة روتانا، واشتكى من وضعه الصحي وظروفه المادية الصعبة، خصوصًا إن علاجه بيحتاج 5000 جنيه شهريًا. طارق قال كمان  إنه بيعرض ألحانه على الفنانين علشان يشتروها لكن بيرفضوا، وذكر بالاسم شيرين عبد الوهاب وأنغام، واللي وصفهم بإنهم تخلوا عنه ومش بيردوا على تليفوناته. طارق في الوقت الحالي مش بيقدر يغني بسبب التهابات حادة في الأحبال الصوتية فبقى بيلحن.

النهاردة المخرج عمر زهران، من خلال حسابه على فيسبوك، أعلن إن طارق فؤاد تلقي مكالمة من تامر حسني، وإن تامر هيتكفل بعلاجه. المخرج كمان أكد إن مكالمة تامر لطارق حصلت في وجوده، وإن تامر ماعندوش أي فكرة إن الخبر هينتشر. نقيب الموسيقيين هاني شاكر قال إن صعب المبلغ اللي بتقدمه النقابة -500 جنيه- لطارق فؤاد يزيد، لكن هيحاول بكل الطرق إن طارق يتم علاجه على نفقة الدولة.