أكاديمية الشرطة لأول مرة في تاريخها أعلنت عن قبول حاملي الدكتوراه والماجستير ضمن الضباط المتخصصين. العادي إن أي حد بعد ما يتخرج من كليته، كان ممكن يقدم في كلية الشرطة ويبقى ضابط متخصص، الجديد بقى إنك ممكن تقدم كضابط متخصص حتى لو معاك ماجيستير أو دوكتوراه.

مساعد وزير الداخلية قال في مؤتمر صحفي، إن قرار قبول حملة الدوكتوراه، هدفه تحسين العمل والارتقاء بيه، حسب سياسة وزارة الداخلية. كمان أكد إن الموضوع مش هيكون فيه أي واسطة أو محسوبية، والناس اللي هتقدم لازم تعدي كل الاختبارات، ولو أي شخص في أكاديمية الشرطة قال للمتقدمين إنه يقدر يقدملهم ميزة، لازم يبلغوا عنه فورًا.

باب التقديم هيبدأ يوم 5 فبراير ولحد يوم 15، والتخصصات المطلوبة بالتحديد، هي الطب والهندسة واللغات، واللي هيتقدم لازم يكون مصري الجنسية ومافيش عليه أي عقوبات جنائية أو جريمة مخلة للشرف.