وزير البيئة خالد فهمي، قال إن حوت إسكندرية اللي رمته النوة على شاطئ فندق أزور، اتدفن بعد تصريح النيابة، وبعد ما خدوا منه عينات بيتم تحليلها في معهد علوم البحار وهيتقدم تقرير بيها للوزارة. الوزير حذر من أكل لحمة الحوت وقال إنها تعتبر سامة، خاصة وإن فيه أجزاء منه بقت متحللة ولا يمكن تناولها حفاظًا على الصحة العامة.

وقال الوزير إن الحوت من فصيلة "ذو الزعنفة الظهرية " Fin Whale، وده من نوع الحيتان اللي بتكون مقصد سياحي في بلاد تانية والناس بتتصور معاه، لأنه غير مفترس ومافيش منه خطر على الإنسان، وبيتغذى على الأسماك والقشريات، وقال الوزير إن وجود الحوت في البحر الأبيض المتوسط أمر طبيعي.