"محمد عبدالجواد"، شاب عنده 34 سنة، شغَّال في محل لبيع السجاد في منطقة السيوف شرق إسكندرية، أول ما سمع صرخات بنت بتتسرق، طلع من المحل وهو فاكر إنها بتتخطف عشان يحاول إنقاذها.

في ثواني كان قدام "التومناية" اللي خطفت من البنت موبايلها هو وزميله في المحل، و وهو بيحاول يوقَّف العربية داسته وسببت كسر 20% من جسمه في منطقة الفك والقفص الصدري والذراع والحوض.

"عبد الجواد" دلوقتي في العناية المركزة في مستشفى خاصة في منطقة فيكتوريا، ومباحث قسم شرطة المنتزه كثفت جهودها عشان تضبط المتهمين من خلال تتبع تليفون البنت المسروق ومواصفات العربية اللي ظهرت في كاميرات المراقبة.