وزارة الآثار طلعت قرار رقم 110 لسنة 2018، باقتلاع 55 منبر من مساجد القاهرة الإسلامية عشان تتخزن لحد ما تتعرض في متحف الحضارة، وفقًا لجريدة "الأهرام"، القرار بيشمل كمان 60 قطعة موزعة بين مشكاوات وكراسي مقرئين وثريات، والهدف هو حمايتها من السرقة.

في الـ 15 سنة اللي فاتت اتسرق حوالي 17 منبر من مساجد القاهرة التاريخية وأجزاء صغيرة منها واتباعت في مزادات عامة، وفي نفس الوقت كانت انجلترا أعلنت من حوالي شهر دعمها لمشروع ترميم أكتر من 25 منبر من منابر القاهرة المملوكية.

القرار رقم 110 بتاريخ 20/2/2018 بيقول إن وزارة الآثار تتولى توفير مستنسخات بديلة للمنابر والمقتنيات بمعرفتها وإن يتم ذلك من خلال لجان مشتركة ومحاضر رسمية، والبند التاني من القرار بيقول "مراعاة عدم الإعلان عن الموضوع".

القطع اللي تم حصرها عشان يتم نقلها من المساجد 115 قطعة موزعة على 58 مسجد، ويستمر نقلها لمدة سنة.