المؤشر العالمي للفتوى، التابع لدار الإفتاء المصرية، أكد إن التنظيمات الإرهابية بتستغل الستات في تنفيذ خططها وارتكاب الأعمال الانتحارية، وإن 60% من الفتاوى الخاصة بالمرأة داخل تنظيم داعش، بتقول إن الستات لازم تشترك في المعارك والقتال. وأضاف المؤشر في تقريره، إن 13% من إجمالي المقاتلين الأجانب الملتحقين بالتنظيم ستات.

المؤشر أوضح إن دور المرأة في التنظيمات الإرهابية اختلف، أيمن الظواهري سبق وكان أعلن إن مافيش مكان للستات في ميدان القتال، لكن -حسب المؤشر- بعد غزو العراق الموضوع اختلف، والأجهزة الأمنية في مدينة ديالي العراقية قالت إن الستات نفذوا 27 عملية انتحارية بين أعوام 2007-2010 بينها 19 عملية نفذتها زوجات وشقيقات عناصر وقيادات تنظيم القاعدة اللي قتلوا في مواجهات مع الأمن.

كمان الستات بقوا بيظهروا في الفيديوهات والإصدارات المرئية للتنظيم بنسبة 30% وده جديد على التنظيم اللي الستات فيه كانوا بيشتغلوا في صمت.