مصر بلد مليانة موسيقيين موهوبين جدًا، فيه منهم اللي نجح في مصر، وفيه اللي نجح برّاها أكتر، وكتير من اللي نجحوا وبقوا مشهورين برّه مش معروفين نسبيًا لأغلب المصريين، وأغلب الموسيقيين دول بيُعتبروا أساتذة عالميين في الموسيقى اللي بيعملوها، بس بيتم تجاهلهم في مصر جايز بقصد أو بغير قصد. في الموضوع دة هانتعرف على 9 من اللي مشهورين برّه أكتر من جوّه مصر.

حليم الضبع

حليم الضبع واحد من أوائل رواد الموسيقى الإلكترونية، كانت مقطوعة الضبع "The Expression Of Zaar" هي أول مقطوعة موسيقية تتسجل على شريط، اتسجلت في 1944، يعني قبل أعمال "Pierre Schaeffer" بـ4 سنين، بعدها الضبع راح يعيش في أمريكا، وهناك فضل يقدم ويطور النوع ده من الموسيقى، وبعدين بقى بيدرّسها في جامعات مختلفة أشهرها (جامعة كِنت – University of Kent) وهي الجامعة اللي قضى فيها أغلب مسيرته المهنية كمدرّس للموسيقى. الضبع مشهور عالميًا بمقطوعته (Laiyla and the Poet) اللي حازت على اهتمام عالمي ضخم جدًا. 

صلاح رجب، ضابط مصري، يُنسب إليه فضل تشكيل أول فرقة جاز مصرية، اشترك رجب مع إدوارد فيزفاري وهاترموت جريكن وكونوا فرقة "Cairo Jazz Band"، ولعبوا موسيقاهم في أماكن محتلفة في العالم، وكان أكثرها شهرة الحفلتين اللي عملوهم مع “Sun Ra Arkestra” سنة 1971 وسنة 1983. رجب مات في 2008، وكل معاهد الجاز في العالم بتفتكره وتتعامل معاه على إنه مبتكر الجاز المصري. 

اتولد شريف نور في بيئة فنية، وبدأ يلعب مزيكا من أوائل طفولته، دخل كلية الحقوق الأول وبعد كده حول لكلية الدراسات الموسيقية، وبعد ما اتخرج سنة 1982 عمل فرقة بدأوا يعزفوا في فنادق وحفلات موسيقية تانية جوّا مصر. سنة 1992 دخل فرقة (محمد منير) وكان مركزه إنه لاعب الأورغ الأساسي، وبعد كام سنة وفي زيارة من زياراته الكتير لألمانيا كسب في مسابقة "Hains Zeidl" بمقطوعته الموسيقية "Body of work". فضل يلف العالم يلعب مقطوعاته الموسيقية المبدعة اللي كان بيلاقي بسببها إعجاب وتقدير من كل حتة في العالم، ونجح نور جدًا في هوليوود بإنه كان بيعمل مزيكات كتير للمسلسلات اللي هوليوود كانت بتنتجها. حاز الفنان على جوايز عالمية كتيرة وبيُعتبر أحد أساتذة المزيكا في العالم. 

فتحي سلامة

فتحي سلامة، الفنان اللي حصل على جايزة "Grammy"، هو معروف جدًا في مصر، بس هو معروف برّة مصر أكتر بكتير. ظهر فتحي سلامة في مهرجانات كتيرة ومهمة في كل حتة في العالم، وكان بيظهر في أغلبها مع فرقته "شرقيات – Sharkiyat". عمل سلامة موسيقى لفيلمين وهما "Fallen Angels Paradises" و"Signs of April" وبسببهم كسب جايزتين. موسيقى سلامة عبارة عن خليط ما بين الموسيقى التقليدية والمعاصرة، وبيغلب عليها الطابع الشرقي، وبذل جهد كبير جدًا عشان يوصّل بين الطريقتين وقدر إنه يعمل توازن ناعم بينهم فعلًا. 

            كريم ناجي

كريم ناجي فنان مصري وبيشتغل حاجات كتير جدًا، زي إنه DJ ومنتج وملحن وراقص ومدرس موسيقى ومدرب رقص. هو اللي بينتج مزيكته وبيحط في المزيكا دي إيقاعات رقص شرقية مصرية هو نفسه بيدرّسها. ناجي بيدرّس الموسيقى والرقص في جامعات كتير حولين العالم من ضمنها (Harvard – Yale – MIT – Princeton – Stanford – Georgetown) وجامعات تانية كتير، وكان بيقود فرقة “SHARQ Ensemble” لسنين كتير، ولف معاهم العالم ولعب مزيكته في مهرجانات كتير. هو اللي ابتكر تكنيك الـ Turbo Tabla وباع نسخ DVD كتير عن طرق تعليمها. 

محمد رجب

محمد رجب اللي معروف باسم "Machine Eat Man"، هو ضيف دائم في مهرجانات أمريكا. بيلعب موسيقى الـ"موج" ومعروف دوليًا بمزيكته، وهو في قمة تألقه دلوقتي ولسه عنده كتير ممكن يقدمه، وغالبًا مزيكته وحفلاته حاجة من عالم تاني. 

               علي & فيلا - Aly & Fila

Aly & Fila هم اتنين من أجمد الـDJ’s في العالم، بدأوا مشوارهم من حوالي 15 سنة، واشتهروا عالميًا في وقت قصير، واللي ساعدهم على كدة مزيكتهم اللي كان ليها تأثير عالي. بدأوا يلعبوا مزيكتهم برّة مصر في مهرجانات وديسكوهات في كل حتة في العالم، ولسة بيلفوا العالم بحفلاتهم لحد دلوقتي.

   كيك كوليكتيف – KIK Kollektive

فريق اسمه "Kairo Is Koming" بس هم مشهورين أكتر باسم "KIK Kollektive"، وهم ناجحين جدًا في أوروبا، ولعبوا مزيكتهم في أماكن كتير من العالم، أعمالهم انطلقت تحت مسميات مهمة مختلفة، ولحد دلوقتي ليها تأثير، وبيلعبوا مزيكتهم في أماكن مختلفة ولسة بيصدروا أعمالهم بشكل دوري ومنتظم.

   داب فانك – Dubfunk

محمد حجاب اللي مشهور برضه باسم "Dubfunk"، هو DJ مصري أعماله انتجتها أهم شركات إنتاج موسيقى الإلكترونيك في العالم، سافر العالم عشان يلعب مزيكته، ووصل لكل قارة، بدايةً من أفريقيا الجنوبية لحد الشرق الأقصى من آسيا. مزيكته مختلفة ومميزة وهو نفسه بيُعتبر من أهم الـ DJ’s في العالم.

ترجمة: مصعب عامر