الفلانتاين على الأبواب والبلد كلها هيبقي لونها أحمر. السناجل هيلتزموا البيوت والcouples هيملوا الشوارع والأزقة. لو البيت عندك مش هيكون فاضي ومالكش في جو العربيات ده، فأنت هتضطر تنزل وتصرف. احنا بقى جمعنالكم أحسن الأماكن اللي ممكن تقضوا فيها المناسبة المقدسة دي.

SHERATON CAIRO

فندق شيراتون اللي فى ميدان الجلاء، عاملين باكيدج للفلانتاين. الباكيدج فيها قائمة طعام منقسمة لـ 5 أجزاء في مطعم Giannini's + غرفة لفردين + فطار + صندوق هدايا فيها (شيكولاتة + زجاجة Wine + تخفيضات 20% في مطعم Giannini's) سعر الباكيدج 2830 جنيه. اه طبعًا العرض ده للمتجوزين بس. للحجز: 0233369800

MARRIOT MENA HOUSE 

لو بتحبوا التاريخ وعايزين تقضوا عيد حبكم وهرم "خوفو" في الخلفية، ممكن تجربوا الماريوت مينا هاوس. بس بلاش الجملة الممحونة بتاعت "حبناهيفضل شامخ زي الهرم ده"، علشان اليوم مايقلبش بفركشة وغم. مطعم 139 بيقدم قائمة طعام مميزة على أنغام الجيتار. للحجز: 02-33773222

JW Marriott Hotel Cairo

لو بتحبوا الأكل الإيطالي والأكل اللي بيمط، ممكن تجربوا مطعم Tuscany اللي في JW MARRIOT التجمع الخامس. للحجز:

02-24115588

Sofitel El Gezirah Hotel

لهواة البهارات والأكل المشطشط، الشيف الهندي Satya Parkash هيطبخلكم بنفسه. مطعم Manipuri Indian  بيقدم عشا مكون من 4 أجزاء ب950 جنيه.

"جنات" في TOLIP HOTEL ALEXANDRIA

الإسكندرانية هيقضوا "فلانتاين" جامد على أنغام أغنية "حب جامد". التحفة الموسيقية دي هتغنيها الفنانة "جنات" مع سيل أغاني رومانسية تانية في TOLIP HOTEL. 

للحجز والاستفسار اتصل على: 01207831111

 كارمن سليمان في NILE POINT

نجمة "آراب أيدول" هتملى الجو رومانسية وحب في حفلتها فى Nile Point، اللي على كورنيش المعادي. "كارمن"هتغني "ربنا يخليك لقلبي" و "لما تشوفك عيني" و طبعا أغنية "حضن دافي" اللي ممكن تطبق عملي بعد الحفلة. سعر التذكرة 400 جنيه شاملة دخول الحفلة نفسها وكوبون خصم 200 جنيه على أي مأكولات أو مشروبات داخل أي مطعم هتختاروه جوَّه نايل بوينت (أتلانتس أو روتانا أو تافولا). 

محمد محسن فى ساقية الصاوي:

اخواتنا اللي بيحبوا العمق، ليهم كل الحق يحتلفوا هما كمان، علشان كده الساقية هتنظم حفلة للفنان "محمد محسن" علشان نحب بعض بأدب واحترام. الحفلة في قاعة النهر الساعة 8 مساءً وسعر التذكرة 75 جنيه.