المواهب الموسيقية في مصر تحديدًا بتحاول دايمًا تلاقي المساعدة والدعم الفني اللي يشجعهم يطلعوا مواهبهم للنور، ومساحة يعرضوا فنهم فيها على الجمهور، والجهات الفنية اللي بتقدم الدعم للمواهب قليلة، وأحيانًا لو قدمت الدعم الفني ماتقدمش الدعم المادي، أو العكس.

من المنطلق ده أعلن المركز الثقافي الفرنسي في القاهرة وبالشراكة مع مركز FGO-Barbara الفني فى باريس في فبراير اللي فات عن مسابقة ومشروع "منيرة الفن" عشان يسمحوا للموسيقيين الشباب إنهم يعرضوا مزيكتهم وفنهم على الجمهور بس بشكل أكبر.
المركز وفّى بوعده، وفي 12 ابريل عرض 6 موسيقيين، أشخاص مستقلين وفرق، موهبتهم قدام الجمهور وتم تصفيتهم في نهاية المسابقة لاتنين من المواهب المميزة وهما: شيرين عبده وعلي بغدادي.

"شيرين" صاحبة صوت قوي ومميز وبتكتب أغاني، وعن فوزها بتقولنا: "النوع ده من المسابقات مابيبقاش موجود في القاهرة غير نادرًا، ولو حصلت مابتبقاش عادلة بالشكل الكافي، لكن في مسابقة "منيرة الفن" حسيت العكس، إنها عادلة وأنا سعيدة بالفوز ده أكيد"، أما "علي" فهو بيمزج ألحان العود مع المؤثرات الصوتية والمزيكا الإلكترونية عشان يطلع مزيج مختلف، وبيقولنا: "أنا لسه ماعملتش مشروعي الموسيقي اللي بحلم بيه، لكن دلوقتي بقت قدامي الفرصة أعرض موهبتي والفن اللي بحاول أوصله للناس قدام جمهور أكبر سواء محلي أو دولي".
الفائزين هيسافروا "فرنسا"، وهيقدموا حفلة فى مركز FGO-Barbara الفني قدام موسيقيين فرنسيين محترفيين، وهيشاركوا فى ورشة تدريبية بقيادة "فتحي سلامة" وفريق من مركز FGO-Barbara الفني فى ستديو "ميت نسخة" المملوك لمحمود رفعت.

وفي سهرة مميزة هيحضرها الآلاف "Fete de la Musique" أو "عيد الموسيقى" اللي بدأ من ٣٧ سنة في فرنسا، ومن ٢٦ في مصر وبيتم فيه تقديم عروض فنية مميزة من الهواة أو المحترفبن في كل أنواع الموسيقى بتنظيم من المركز الثقافي الفرنسي، هيتم افتتاح المهرجان نسخة 2018 بالفائزين في المسابقة اللي نظمها المركز:"شيرين عبده" و"علي بغدادي"

وبما إن المركز الفرنسي مهتم دايمًا بتقديم الأنواع المختلفة للمزيكا للجمهور، فجدول اليوم هيكون فيه تنوع موسيقي واضح، وهتسمع أكتر من لون فني مختلف، يعني هتقدر تسمع فرقة "هوس" اللي بيحاولوا يقدموا الموسيقى البديلة بشكل مختلف وصوت جديد، وبعدين يحصل تحوّل وتسمع مزيكا الروك مع الفرقة الفرنسية "القصر"، وفرقة "أسيد أراب" اللي بتستوحي أغانيها من الثقافة العربية وبتمزجها بأنواع المزيكا التكنو والديسكو.

المهرجان هيكون يوم الجمعة 22 يونيو في حديقة الأزهر، من الساعة 6:30 مساءً، والحضور هيكون "مجاني"، لكن غير شامل تذكرة دخول حديقة الأزهر

تقدر تعرف تفاصيل أكتر عن "عيد الموسيقى" من هنا