في دورته الخامسة، في قلب القاهرة، هتتعمل قمة RiseUp لرواد الأعمال والمبدعين. بقيادة فريق عمل ومتطوعين مُتمرِّسين، قمة RiseUp  بتكبر وتحقق نجاح أكبر في كل دورة ليها، بهدف أساسي هو مساعدة أصحاب المشاريع الصغيرة على النمو وربطهم بالموارد المادية وتعريفهم على القوانين الدولية المُنظمة لأعمالهم.

القمة هتستمر تلات أيام، بدايةً من يوم 1 ديمسبر.  في سباق أشبه بالماراثون، تحت شعار HX -اللي بترمز لـ Human Experience- هيبقى واحد من أهم أهداف القمة هو ازاي ممكن رواد الأعمال يفيدوا ويثروا التجارب الإنسانية ويسهلوا حياة البشر، بالإضافة لهدف القمة الأساسي وهو دعم المشاريع الصغيرة -أيًا كانت المرحلة اللي وافقين فيها- عن طريق تشجيعهم لحضور ورش العمل والنقاشات اللي هتحصل، وتكوين علاقات مع المستثمرين.

لو أنت رائد أعمال وعايز تحقق أقصى استفادة من القمة، محتاج تركِّز على شوية حاجات..

*خطط كويس لعرض مشروعك في  RiseUp’s Startup Station

 من وسط كل المتقدمين، هيتم عرض أبرز 150 startup في منطقة الشرق الأوسط وشمال أفريقيا، مع فتح مجال ليهم علشان يجتمعوا مع أكتر من 5000 عميل مُحتمل. الاهتمام الأكبر هيكون للإبداع والتكنولوجيا ورأس المال والابتكار. كل أصحاب المشاريع من الـ 150 شركة هيكون ليهم يوم واحد بس لعرض أفكارهم.

العرض مش هيكون بس على الأرض في القمة، لكن بطريقة ديجيتال كمان من خلال موقع  RiseUp، الأبليكيشن والسوشيال ميديا بتاعتهم.

*حضَّر أسئلة عايز تعرف إجاباتها من الـ Mentorsهناك:

من خلال جلسات متعددة الأطراف واجتماعات منفردة، هتقدر تاخد نصيحة مناسبة لمشروعك ولمشاكله من مستثمرين وعملاء محتملين.

*ركِّز في اللي حواليك هناك

وأنت واقف في القمة، ممكن تبص وراك تلاقي أكبر مستثمر بتحلم إنك تقابله ويتعاون معاك. حضَّر نفسك للحظة دي واكتب ملخص عن مشروعك وفكرته عشان تعرضهم عليه في الدقايق دي. 

*هتلاقي ايفنت اسمه Supermarket..  مهمة دي ركِّز فيها

الدورة دي RiseUp هيعملوا ايفنت اسمه  Connect Supermarket، في الايفنت ده هتقدر تختار من بين مميزات وعروض كتير لأنشطة وخدمات مقدمة من مؤسسات Startups، وبما إنك رائد أعمال أكيد هتحتاجها، زي: الماركتينج والمواصلات وطرق الدفع.

*حضَّر نفسك للتقيل.. Startup Showdown

هيبقى في 50 من أحسن الشركات الصغيرة هتيأهلوا لنوعين من المسابقات، الأولى pre-seed هتبقى في اليوم الأولى مخصصة للمشاريع اللي حققت ربح أقل من 50 ألف دولار، و post-seed في اليوم التاني للمشاريع اللي حققت ربح أعلى من 50 ألف دولار.

كل صاحب مشروع هيتخصصله 5 دقايق يتكلم فيهم عن مشروعه، ويتنافسوا على جوايز مادية ورحلات لمراكز رئيسية لريادة الأعمال.