السفارة الأمريكية كرمت ست صعيدية حققت أكبر إنتاج من محصول البطاطس
الحاجة فايزة عويس ست صعيدية مصرية كرمتها الوكالة الأمريكية للتنمية واحتفت بيها السفارة الأمريكية عشان حققت أعلى إنتاجية في محصول البطاطس، اللي وصلت 32 طن من محصول البطاطس من فدانين بس، واعتبرت الوكالة العدد ده معدل حصاد عالمي.
"فايزة" بتشتغل في الزراعة من وهي عمرها 7 سنين، ودلوقتي عندها 68 سنة وعايشة في مركز ناصر في محافظة بني سويف، وكان الإنتاج اللي بتحصده من 6 لـ8 طن للفدان الواحد، لكن اشتركت في ندوات الوكالة الأمريكية للتنمية والتزمت بتعليمات وإرشادات المهندسين الزراعيين، عشان تحقق أعلى إنتاجية للفدان.
الحاجة فايزة خلصت محو الأمية وفتحت فصل في قريتها لتعليم غيرها كمان.