لو أنت في وسط البلد، ممكن تعدي تشوف العرض المسرحي "الضوء الأخضر" اللي بيتعرض في المعهد الفرنسي بوسط البلد، وبيحكي عن قضية أطفال الشوارع، وأبطال العرض هما من أطفال الشوارع الشوارع اللي بيقدموا قصتهم الحقيقية للحضور.

مؤسسة "ساموسيال إنترناسيونال المصرية" قامت بتبني مجموعة من أطفال الشوارع واستضافتهم، عن طريق إنهم بينزلوا الشوارع ومعاهم طبيب إخصائي نفسي واجتماعي وعربية إسعاف، بتقول  مريم عبدالله، مسئولة التواصل والتوعية بالمؤسسة، لموقع الوطن: "بنستقبل الأطفال جوه العربية وبنعرّفهم بنفسنا وبندخّلهم من المدخل الطبى إننا عايزين نتابعهم صحياً ونكشف عليهم، وبعدين نعرض عليهم أننا نوديهم دار إيواء بدل الشارع وبدون إجبار، اللى بيوافق بناخده معانا واللى مش عايز بييجى يعرض فى المسرحية ويرجع للشارع تاني".

أعمار المشاركين في العرض من 10 لـ 16 سنة، والهدف الرئيسي هو دمج الأطفال دول في المجتمع وتقويم سلوكهم ومحاولة أنقاذهم من الشارع، لكن بعد ما بيخلصوا العرض بيكون الطفل له حرية الاحتيار إنه يروح ملجأ أو يرجع للشارع تاني.