بعد 28 سنة مصر وصلت أخيرًا لكأس العالم وهيصنا مع هدف صلاح في الكونغو، ورغم إن كلنا بنشوف صور "كاس العالم" لكن السنة دي إحساسه بقى مختلف تمامًا. كاس العالم هيجي مصر في جولته الرابعة من كوكاكولا يوم 15، 16 مارس وهتبقى الاحتفالية تحت رعاية وزارة الشباب والرياضة المصرية عشان مشجعين كرة القدم المصريين يشوفوا كأس العالم. 

كوكاكولا هتتعاون مع فيفا عشان الكأس يلف 91 مدينة في 51 بلد في 6 قارات على مستوى العالم، عشان الناس تشوف كأس العالم الحقيقي من قريب وتفرح بيه، جياني انفانتينو رئيس الاتحاد الدولي لكرة القدم فيفا قال إن مفيش رمز اقوى من كأس العالم لكرة القدم، والكأس ده بيوحد الناس"، الكأس هيجي مصر بعد زيارة ساحل العاج، وهيمشي منها عشان يروح نابولي في إيطاليا ويعمل جولة أوروبية سريعة قبل ما يوصل الأرجنتين.

نرجع بقى لجولة مصر، الكاس هيوصل يوم 15 مارس، ينزل في القصر الرئاسي وياخد واجبه، بعدها يروح يقعد مع المشجعين في كايرو فيستيفال سيتي، ناخد سيلفيهات معاه، بس من بعيد، ممنوع اللمس ده مش بتاعنا. يطير الكاس مرة كمان، بس المرة دي على الجونة، وهناك هتكون في مفاجآت كتير في انتظاره.

كريم صلاح الدين المدير العام لكوكاكولا فى مصر، قال إن المصريين بيصنعوا التاريخ بوصولهم كأس العالم، وعشان كده كوكاكولا صممت إن مصر تبقى ضمن جولة الكأس العالمية، ورغم إنها مش أول مرة الكأس ييجي مصر، لكن الإحساس مختلف بعد تأهل المنتخب.

 ممكن تعرف أكتر من الموقع الرسمي، أو من صفحة الفيسبوك وانستجرام