لو أنت "Youtuber" وحد سألك بتشتغل إيه؟ ممكن تقوله صانع محتوى أو Content Creator فيحس إن الموضوع كبير ومعقد ويديك برستيجك، هو الموضوع فعلًا كبير، ومش من دلوقتي ده من زمان، حتى لو ناس كتير لسه مش فاهمين ده، إنك تطلع محتوى كويس دي مش حاجة سهلة، أيًا كانت المنصة اللي هتقدم خلالها المحتوى بتاعك وأيًا كان نوع المحتوى. "يوتيوب" مقدرينك ومهتمين إنهم يوفرولك إمكانيات تطور الشغل بتاعك، فعملولك أول YouTube Space في منطقة الشرق الأوسط وشمال أفريقيا في مدينة دبي للاستوديوهات.

أنا كده استفدت إيه؟ باختصار لو أنت بتعمل فيديوهات على يوتيوب، دلوقتي في دبي بقى في مساحة تقدر تشتغل فيها على فيديوهاتك، مكان واسع فيه ستديوهات جاهزة بكل المعدات اللي تخليك تطلع شغل نضيف، تصوير بقى وصوت ومونتاج، كله موجوده وكل ده هيكون مسموحلك تستخدمه بشكل مجاني. المساحة دي هي الأولى من نوعها في الشرق الأوسط وشمال أفريقيا، والعاشرة على مستوى العالم، بعد لندن، وطوكيو، ولوس أنجلوس، ومومباي، وتورونتو، وباريس، وبرلين، وساو بولو.

لما تدخل المكان هتلاقي غرفة استقبال وقهوة وستديوهين جاهزين وغرفة إنتاج ومكتبين للمونتاج، وكاميرتين كانون C500 و C300، وكاميرا 5D. المكان ممكن يستوعب أكتر من 200 واحد بيشتغلوا على أفلام أو فيديوهات في نفس الوقت، ومساحته 6000 قدم حاجة أقل من 2000 متر بشوية. كل المطلوب إنك تكون عندك قناة على يوتيوب فيها أكتر من 10 آلاف مشترك، هتسجل على YouTube Space علشان تحجز ستديو، يوتيوب هتدرس الطلب بتاعك وترد عليك. لو القناة بتاعتك فيها عدد مشتركين أقل من المطلوب، هتقدر تحضر الورش والتدريبات علشان تعمل فيديوهات، فتنجح، فتتشهر، فيبقى عندك أكتر من 10 آلاف مشترك.

روبرت كينكل، رئيس قسم الأعمال في YouTube، قال إن المنطقة العربية والشرق الأوسط دلوقتي، بقى فيها أكتر من 200 قناة يوتيوب معديين المليون مشاهدة، وده اللي ماكانش موجود قبل 5 سنين، كمان في 30 ألف قناة عندهم أكتر من 10 آلاف مشترك، ودول اللي يقدروا يسجلوا ويستخدموا المساحة الجديدة، الإحصائيات بتبين برضه إن عدد قنوات يوتيوب زادت بنسبة 160% في آخر 3 سنين بس. مش لازم تكون مذيع أو مطرب مشهور علشان الناس تكون عارفك، شوف بس أنت عاوز تقول إيه ويوتيوب هينتجلك.