من حوالي شهر كتب تركي آل الشيخ عن مشاكله مع النادي الأهلي ورئيسه محمود الخطيب، وكشف عن تفاصيل الصفقات والفلوس اللي دفعها وتوعد برفع قضايا تضمن حقه. الخطيب من ناحيته رد وقال إن الأهلي مستعد للتحقيق في مصادر أمواله، لكن تركي آل الشيخ ماتنازلش عن كلامه. 

امبارح في حلقة برنامج أحمد شوبير على قناة صدى البلد، اتصل وزير الرياضة السعودي تركي آل الشيخ وقال إنه هيتنازل عن كل القضايا اللي كان هيرفعها ضد النادي الأهلي أو مجلس إدارته وإنه هيفتح صفحة جديدة، لأنه محب للرياضة ومحب لمصر ومش هيسمح بأي أذى يضر بالنادي الأهلي.

تركي أل الشيخ قال كمان إنه مش مستني اعتذار لكنه بيعمل ده عشان النادي الأهلي، وإنه بصفته رئيس الاتحاد العربي للأندية فهو واجبه يخدم كل الأندية.

أحمد شوبير سأل تركي آل الشيخ عن المشاريع اللي اتفق عليها مع النادي الأهلي وكان رد تركي إنه ملتزم بالصفقات اللي اتفق عليها مع النادي الأهلي، اللي منها الاستاد ومدينة الأهلي الرياضية، وإنه مش هيرجع في كلامه وجمبها هتكون مدينة نادي الأهرام.