لمَّا بتسمع كلمة سومو، بيجي في بالك مصارعين يابانيين وزنهم كببير، لكن مصارع سومو أفريقي، مصري؟! مابتجيش في بالك كتير دي.

"عبد الرحمن شعلان" هو أول مصارع سومو مصري محترف في العالم، ولقبه بالياباني Ōsunaarashi كينتارو، بمعنى العاصفة العظيمة. اتولد في محافظة الدقهلية في فبراير 1992، لعب وجرَّب كل أشكال كمال الأجسام والمصارعة، اتهزم كتير من مصارعين نصف حجمه، لحد ما وصل للسومو وهو عنده 16 سنة وسافر عشانه استونيا وبلغاريا.

بعد سنين اتعلم فيهم حاجات كتير تخص السومو، رجع "شعلان" مصر عشان ينهي دراسته الجامعية. لكن شغفه بالسومو فضل مستمر ودفعه للسفر لليابان عشان يحسِّن من نفسه ومن مستواه، بعد فشل كتير ونجاحات أكتر اتقبل كـ Ōtake-beya.

"شعلان" أو كينتارو، قدر يوصل لنجاحات مثيرة للإعجاب، لكن في نفس الوقت وهو محافظ على معتقداته الإسلامية، فـ اتجنب أكل لحم الخنزير وشرب البيرة رغم أهميتهم في النظام الغذائي للسومو، بالإضافة لإنه صام رمضان وهو بيتدرب ويلعب بطولة فيه.

دلوقتي وصل لإنه يبقى سفير مصر للسياحة في اليابان، وهيشتغل على تنمية الاهتمام السياحي في البلاد وزيادة السياحة اليابانية حوالي أربع أضعاف، بالإضافة لإنه بدأ فيلم وثائقي عن المعالم السياحية في مصر.