جربت تتليف بصابونة ب2800 دولار؟ آخر مرة استحميت كانت أمتى أصلًا؟ القرية اللبنانية اللي اسمها "بدر حسون" بتنتج صابونة تمنها 2800 دولار، وبكدة تكون أغلى صابونة في العالم. القرية دي تختلف عن باقي قرى لبنان، في إنها مافيش فيها لا سكان ولا مباني، مافيش غير مصنع الصابون والزيوت المستخرجة من الأعشاب، واللي بينتجوا فيه الصابونة دي، القرية كمان أخدت اسمها من اسم صاحب المصنع.

الصابونة واخدة براءة اختراع ومكوناتها من الدهب ودهن العود الكمبودي وزيوت نادرة و30% عسل طبيعي. الصابونة طبيًا هي الأفضل للجلد، وبتساعد في شد البشرة بسرعة وبتخفف علامات تعب العين، حسب المصنعين بتوعها. الصابونة واخدة ترخيص من المنظمة الدولية للمعايير وبتستجيب لكل شروط منظمة الصحة العالمية.

حسب كلام صاحب المصنع بدر حسون لموقع "إرم نيوز"، طبخ الصابونة بيحتاج من 8 ل 16 ساعة، بعدها بتتساب تنشف وبيتضاف ليها الأعشاب والعسل. المواد الأولية اللي بتتصنع منها الصابونة، بيتعملها فحوصات في مختبرات خاصة، حتى المياه المستخدمة بيتم فحصها، وبيفحصوا المنتج كمان بعد تصنيعه.

الصور من موقع "إرم نيوز"