قدام بوابة النادي الأهلي فرع الجزيرة، هتقابل "نور"، شاب حوالي 27 سنة، قاعد بيقرأ قرآن وهو قاعد على الرصيف، باين عليه ملامح الزهق والإرهاق وبيحلم بأوضة وعلاج بس.

في شخص صوَّره بعد ما أخد موافقته، المصور قال إنه بيشوفه من حوالي 3 شهور قاعد في نفس المكان، وسأله عن حكايته..

"نور" حكى إنه جه القاهرة وهو عنده 12 سنة، بعد ما طردته جدته أم والدته وجوز أمه من بيته في الشرقية، وعائلة والده في الإسماعيلية ماوفقتش يقعد معاهم. كمِّل "نور": أنا ريحت دماغي وجيت هنا وأنا عندي 12 سنة وقعدت، من ساعة ما جيت بنام تحت الكوبري، لميت زبالة وعملت حاجات، بس من 5 سنين لقيت نفسي برجع دم، ولو طلعت السلم دور واحد أقع، بدوخ وأقع، لو شيلت حاجة مثلًا كيلو أدوخ وأقع.

ولمَّا سأله عن المكان اللي بيدخل فيه الحمام، قاله "نور": المسجد وقسم شرطة قصر النيل، بمساعدة "محمد باشا علي" اللي بيخلّيني أدخل الحمام واستحمى، وفي رمضان بيجيبوا لي الفطار قبل ما يفطروا هما. وسأله الشاب عن الأمراض اللي بيعاني منها، فقال "نور": عندي بلهارسيا وفيه كهرباء شديدة أوقات تتحرك وأوقات تثبت.

"نور" مش عايز غير أوضة، مش عايز فلوس، عايز بس أوضة وعلاج. وقال "نور" إن أي شخص عايز يساعده هيلاقيه قدام النادي الأهلي "تحت نازلة كوبري أكتوبر المتجه للنادي الأهلي".