مجموعة ملثمين خصطفوا اب في عربية. حادثة ممكن تقراها كل يوم، بس اللي مش هتلاقيه كتير، إن في بنت شافت الواقعة فقررت تطارد الخاطفين بعربيتها لغاية ما قدرت تسلمهم للشرطة. ده اللي عملته يارا علاء الدين. يارا كانت مع أسرتها بيسوقوا عربيتهم في مدينة نصر، لاحظوا عربية جنبهم فيها ملثمين وشخص بيقاومهم، في الأول افتكرت إنهم خاطفين بنت، نبهت والدها اللي على طول راح وراهم وطلب من الناس تساعده.

بعد مساعدة من الناس وشوية كدمات، قدرت يارا ووالدها يقبضوا على الملثمين ويضربوهم ويسلموهم للشرطة، واكتشفوا إن المخطوف شاب سوري مش بنت. يارا نشرت فيديوهات للواقعة على صفحتها على فيسبوك، وكانت ضيفة على برنامج العاشرة مساءً لوائل الإبراشي، وحكت تفاصيل اللي حصل.