الهيئة العامة لنقل الركاب في إسكندرية، أعلنت عن ميعاد استلام أول أتوبيس نقل عام بيشتغل بالكهرباء من الصين، عشان يدخل الخدمة ويبدأ ينقل الركاب بطريق الكورنيش، خط رأس التين - المندرة.

الأتوبيس هيوصل في يونيه الجاي، وحسب تصريحات اللواء خالد عليوة، رئيس مجلس إدارة الهيئة العامة لنقل الركاب، لموقع "المصري اليوم"، فالأتوبيس سعته 90 راكب ومكيف وفيه خدمات واي فاي وكرسي متحرك لذوي الاحتياجات الخاصة. "عليوة" أكد كمان إن الأتوبيس مش بيسبب أي تلوث وبيمشي بسرعة 80كم في الساعة.

الأتوبيس بيحتاج يتشحن من 3 ل 4 ساعات عشان يمشي 250 كيلو، بس لو هتشغل التكييف يبقى هيمشي 210 كيلو بس. الهيئة كانت وقعت في يناير اللي فات عقد لتوريد 15 أتوبيس بيشتغلوا بالكهربا، مع شركة «BYD»الصينية، وده هيخلي المدينة تبقى أول مستخدم للأتوبيس الكهربا في مصر والشرق الأوسط.