أخوية " ديلتا سيجما فاي" الأمريكية في جامعة ميتشيجن بالولايات المتحدة، كانت بتحضّر لحفلة بالطابع المصري باسم "النيل"، ودعوا فيها الطلبة إنهم يجووا بزي فرعوني وقالوا "تعالوا لابسيين لبس مومياء، أو كليبوباترا أو توت عنخ آمون، البسوا أفضل لبس فرعوني تقدروا عليه". كتبوا كمان إن الحفلة دي "على شرف جذورنا المصرية في الهرم الجديد". طبعًا "جذورنا المصرية"و "الهرم الجديد" دول ممروش مرور الكرام على الطلبة المصريين في الجامعة، الطلبة اعترضوا على الtheme  بتاع الحفلة دي واعتبروه سرقة لحضارتنا المصرية وبالتالي الجامعة وقفت الحفلة والأخوية نزلت بيان إعتذار.

ياسمين عفيفي، رئيسة اتحاد الطلبة المصريين بجامعة ميتشيجن وطالبة بالجامعة، نزلت بيان غاضب على فيسبوك بتحكي فيه اللي حصل وازاي فكرة الحفلة دي مهينة للحضارة المصرية وفيها سرقة لتاريخنا. ياسمين قالت "الموضوع أكبر من مجرد حفل" وإن سرقة "البيض" للحضارة المصرية وتأثيرهم على أصولنا المصرية ممتد من زمان. البيان انتشر والجامعة استجابت له، لكن استخدام ياسمين للفظ "البيض" في وصفها للطلاب الأمريكيين وإن سرقة الثقافة شيء مش غريب عليهم، اعتبرته بعض الحركات الطلابية بالجامعة  مهين للطلاب الأمريكيين.

جدير بالذكر إن الحفلة الملغية كانت هتحصل يوم 1 سبتمبر كاحتفال بقدوم الطلبة الجداد وإن الحفلات في الأخويات بالجامعة الأمريكية بيكون فيهم رقص وشرب، ودايمًا بيكون ليهم طابع معين -theme مختلف- لكل حفلة.