أسرة مصرية في محافظة السويس كانت ضحية من ضحايا لعبة "الحوت الأزرق"، بعد ما الأب اتفاجئ بإن ابنه بيحاول يحرق أخواته البنات أثناء نومهم، ولما منعه، الولد قال لأبوه إنه هيحرقه هو كمان، وإنه بينفذ المطلب رقم 36 للعبة الحوت الأزرق.

أصدقاء الشاب وجيرانه في منطقة العبو بالسويس، قالوا إن الولد واسمه محمد، 21 سنة، بلغهم إنه بيلعب لعبة الحوت وفرجهم على رسمة الحوت على دراعه واللي رسمها بآلة حديدية وسببتله إصابات. لما الأصدقاء دول عرفوا بمحاولة صاحبهم إيذاء أسرته، بلغوهم إن ده بسبب اللعبة، لكن الأسرة ماصدقتش، واعتقدوا إن ابنهم عنده مشاكل نفسية.

الولد اعترف بعدها إنه بينفذ تعليمات اللعبة، وإن له واحدة صديقته بتلعب اللعبة معاه، وساعدته بمبلغ 3 آلاف جنيه عشان يقدر ينفذ التعليمات والمهمات.