المشرف العام علي تطوير منطقة الهرم الأثرية، الدكتور محمد إسماعيل، قال إن المنطقة هتشهد تغيير كامل خلال الفترة الجاية، وإن الأهرامات بقت أشبه بحديقة حيوان مفتوحة، لكن المشروع هيغير ده بشكل كامل. هيتم إغلاق مدخل مينا هاوس وباب الدخول هيبقى من مدخل الفيوم فقط، المنطقة هتكون مؤمنة بالكامل ومحرمة على أي حد إلا الزائرين فقط، هضبة الهرم هيتم توصيلها بالمتحف المصري الكبير، وشكل ميدان الرماية هيختلف تمامًا، وطريق إسكندرية الصحراوي هيكون عبارة عن ٣ حارات وهيتعمل ممر من المتحف الكبير للهرم لنزلة السمان وهيتم فتح بوابة أبو الهول للزائرين.

تكلفة المشروع وصلت لحد دلوقتي ٤٠٠ مليون جنيه مصري، ده من غير السيارات الكهربائية. الفترة اللي فاتت اتعمل مركز زوار فيه مكان لقطع التذاكر وهيكون فيه قاعة سينمائية لعرض المنطقة الأثرية وهتوزع فلايرز فيها كعلومات عن المنطقة وماكيت كبير للمنطقة ممكن يتشرح عليه وهيكون في سيارات كهربا بتتحرك كل ٥ دقايق عشان تنقل الناس من المدخل لحد المنطقة الأثرية. المشرف العام قال إنه تم الانتهاء من حوالي ٨٥٪ من مسار بيمتد من مدخل الفيوم لغاية الهرم التاني، حاليًا جار العمل على مسار من الهرم التاني لحد الهرم الكبير. 

كمان كل البياعة الجائلين والخيالة هيتم نقلهم لمكان تاني وهيبقي مكان خاص للتصوير معاهم، وأخيرًا هيبقى في منطقة للتريض لهواة ركوب الخيل.