أسرة إماراتية نسيوا بنتهم في مطار دبي، وبعد ما وصلوا البيت في مدينة "العين"، جاتلهم مكالمة من الإدارة العامة لأمن المطارات بشرطة دبي، بتبلغهم إن بنتهم لسه في المطار. الغريب في الواقعة إن الأب والأم ماكتشفوش غياب بنتهم حتى بعد ما وصلوا البيت، واكتشفوا ده من خلال مكالمة الضابط في المطار.

إدارة المطار جالها بلاغ إن فيه طفلة عندها 3 سنين وموجودة في مبنى في مطار دبي. وبعد الإجراءات السريعة اللي قامت بيها الإدارة، زي إنهم راجعوا كاميرات المراقبة في المبنى عشان يشوفوا مسار الطفلة ويعرفوا أهلها، تم إبلاغ الأب اللي برر اللي حصل بإن عدد أفراد أسرته كبير، لدرجة إنهم كانوا راكبين عربيتين وهو كان فاكر إن بنته في العربية التانية، الأب أخد بنته وشكر رجال أمن المطار اللي اهتموا بالبنت خلال الفترة دي.