في منزل قديم وأثري في مدينة نابلس دشن الفلسطيني منتصر صلاح متحف في بيته بيضم قطع أثرية ومشغولات وأدوات تراثية، اكتر من 5 ألاف قطعة بيرجع عمرها اكتر من 4 الآف سنة، جمعها صلاح على مدار 30 سنة، عشان يحطها في بيته اللي ورثه عن ابوه وبيرجع عمره لحوالي الف سنة.

"صلاح" قال إنه بيعمل كده عشان يقف قدام سياسات التهويد الإسرائيلية اللي بتغير شكل الموروث الثقافي والحضاري لفلسطين. المتحف فيه مفاتيح أثرية وسيوف وعملات ورقية ومعدنية من عصور مختلفة ووثائق تعود للحقبة العثمانية. وجمب كل قطعة اثرية فيه شرح بيوصفها وبيحكيها. صاحب المتحف بيقول إن الزائرين بيقدروا يعرفوا شكل الحياة اليومية للفلسطينيين قبل النكبة من خلال عرض صور ومقتنيات للبيت الفلسطيني والمطبخ وكل حاجة كانت بتستخدم زمان.

مش بس جوه البيت، لكن كمان قدامه فيه عرض لقطع اثرية من كل القرى الفلسطينية، و مكتبة أثرية فيها 1200 كتاب وأوراق رسمية لممتلكات الفلسطينيين بتثبت انهم اصحاب الأرض.