محمد شهيم سيتايوان شاب أندونيسي مسلم عايز يسافر مكة علشان يحج، محمد قرر يسافر المسافة كلها اللي هي حوالي 9 آلاف كم مشي على رجله. الرحلة بدأت يوم 28 أغسطس 2016، وكان متوقع إنه يوصل بعد حوالي سنة، لكنه وصل في وقت أقل من كده بشهر. وكان "محمد" بيفضل السفر بليل ويستغل النهار علشان يبات في المساجد والمباني العامة وبيوت السكان اللي اتعرف عليهم في رحلته.

"محمد" كان بيمشي كل يوم حوالي 50 كيلو متر لو مش تعبان، واحيانا المسافة دي بتقل لـ10 كيلو متر بس لما يحس بتعب، وماكنش معاه غير حاجات قليلة جدًا في رحلته علشان يكون أخف، زي قميصين، وبنطلونين وجزمتين والخيمة، ونسخة من القرآن الكريم، وكان شايل معاه علم صغير لأندونسيا. سبب قيامه بالرحلة دي رغم إمكانية ركوبه طيارة، هو إنه يتعلم تأديب النفس ويقوي إيمانه، "محمد" قال: "أنا كنت عايز أجاهد أكتر واتعلم تأديب النفس واكسب معركتي الروحية، وأقابل ناس مختلفين اتعلم ثقافتهم وقيم التسامح".

مكتب الشئون الدينية الأندونيسي، خلى والد "محمد" يوقع على أوراق بعدم اعتراضه على الرحلة قبل سفره، وقابل "محمد" حاجات غريبة في الرحلة، زي تعابين في ماليزيا وقدر يهرب منها، وتم استضافته في معبد بوذي في تايلاند، وقعد مع علماء مسلمين في مسجد في الهند، واتصاحب على زوجين مسيحين ايرلندين كانوا بيعملوا سياحة ركوب دراجات.

ناس كتير ساعدت "محمد" خلال رحلته وادوله أكل يساعده يكمل مشواره، وكان بيتواصل مع السفارات والبعثات الأندونيسية في كل بلد علشان يجهزوله تأشيرة البلد اللى بعدها.