لما تم الإعلان عن إطلاق أبليكيشن "جلوڨو" في مايو 2018 الناس كانت مبهورة بفكرة إنه أبليكيشن تقدر تطلب من عليه أي حاجة من أي مكان (سوبر ماركت- صيدليات – مطاعم، محلات هدايا وغيرها) ويوصلك لحد عندك في أسرع وقت وبتكلفة قليلة جدًا، بجانب خدمات الشحن اللي بيقدموها زي إنهم يوصلوا أغراض شخصية، وفي نفس الوقت يُعتبر أبليكيشن صديق للبيئة؛ لإنه بيعتمد بشكل كبير على استخدام الدراجات الهوائية في التوصيل.

الأبليكيشن في بدايته كان بيشتغل في نطاق ضيق في القاهرة وبدأ يتوسع لمناطق كبيرة في القاهرة زي وسط البلد والزمالك والمعادي، وفي الدقي بمحافظة الجيزة، وبقى متواجد في الرحاب بالقاهرة الجديدة، وكمان في إسكندرية، وهتتواجد في مدينة المنصورة و"مدينتي" في القاهرة على أخر السنة.

يوم عن يوم "جلوڨو" بتحاول تغطي أكبر عدد من المناطق، وتوصل لأكبر شرايح ممكنة من العملاء.
التوسع ده بيثبت مبدأ أو فكرة إن التوسع بيواكبه استمرارية في تطوير الإمكانيات اللي بتقدمها أي شركة، ومن هنا بدأت "جلوڨو" في افتتاح مراكز تدريب وورش عمل لمندوبي التوصيل أو "جلوڨرز"، ومؤخرًا افتتحت المركز التالت في مصر والتاني في القاهرة ومقره في شيراتون بمصر الجديدة؛ لتدريب مندوبي التوصيل ودعمهم، بجانب المركز الموجود في المهندسين وفرع في محافظة إسكندرية. 

افتتاح المركز الجديد بيعكس اهتمام "جلوڨو" بالتوسع في السوق المصري، وجذب عملاء أكتر. المراكز هتقدم للعاملين بالشركة التدريبات اللازمة عشان يقدموا شغلهم بكل دقة ومهارة، بجانب الدعم المطلوب لمساعدة مندوبي التوصيل "جلوڨرز" في حل المشاكل اليومية اللي بتقابلهم أثناء شغلهم، وكمان هتوفر لهم دورات تدريبية أولية بعد التعيين على طول؛ عشان يتعرفوا على جو الشغل في "جلوڨو".

الدورات هتشمل كمان تدريبهم على تشغيل واستخدام الأبليكيشن على موبايلاتهم، وإزاي يتعاملوا بحرفية مع العملاء والمحلات، ونظام الدفع، بجانب ورش العمل المصممة لمندوبي التوصيل "جلوڨرز".

حفل افتتاح المركز الجديد حضره ممثلي شركة "جلوڨو" من إسبانيا ومصر، وعلى رأسهم ساشا ميشود، الشريك المؤسس لشركة "جلوڨو" العالمية، ورودريجو ألير، المدير العام الاقليمي لأوروبا الشرقية والشرق الأوسط وأفريقيا، ومصطفى كامل، مدير قطاع المبيعات في مصر.

مصطفى كامل، مدير قطاع المبيعات في مصر قال في كلمته إن مبيعات "جلوڨو" زادت بنسبة 35% وقاعدة العملاء بنسبة 8-10٪ في المتوسط شهريًا، وحصل تعاون بين "جلوڨو" وأكتر من ألف شريك محلي وعالمي في كل المجالات، وده ساعد على زيادة في المبيعات والإيرادات للشركاء بنسبة 25-50٪.

عوامل نجاح الشركة قالها ورودريجو ألير، المدير العام الإقليمي لأوروبا الشرقية والشرق الأوسط وأفريقيا لشركة "جلوڨو" أثناء الحفل في كلمته أثناء الحفل: "الشركة بتحاول تغير مفهوم "الديلفري" عشان يشمل حديثي التخرج من الجامعات، مايبقاش مقتصر على الحاصلين على الشهادات المتوسطة بس، وده بيدعم الشباب بمختلف أعمارهم، وكمان شركة "جلوڨو" تعتبر أول شركة استخدمت الدراجات الهوائية في مجال توصيل الطلبات، كجزء من إستراتيجية الشركة للحفاظ على البيئة"

"جلوڨو" قدرت توصل لأكتر من مليون عميل في مصر، وأتاحت أكتر من 5 آلاف فرصة عمل من بدايتها في السوق المصري من سنة ونص، وبتخطط لزيادتهم 6 آلاف فرصة عمل إضافية في نهاية 2020.