صحة أولادنا أولوية عندنا، بس كام أسرة بتأكل ولادها جانك فود؟ وكام أم بتستسهل وتفطر طفلها لحوم مصنعة عشان هو بيحبها وبتقضي الغرض؟ والأهم، بعد ما نخلص اللانش بوكس وفقرة الأكل، كام أسرة بتعوِّد أولادها على العناية بأسنانهم بشكل صحي وحقيقي أعمق من الغسيل اليومي؟

شركة يونيليفر مشرق، ممثلة في منتج سيجنال اهتمت بالأسئلة دي، خصوصًا السؤال الأخير، وعشان كده أطلقت بالتعاون مع منظمة الأمم المتحدة للطفولة "يونيسف" الموجودة في أكتر من 190 دولة، برنامج لتوعية الأطفال، باسم "الحفاظ على المياه والصحة والتغذية السليمة".

حضر فعالية إطلاق الحملة العضو المنتدب للشركة، أشرف بكري، ومدير قطاع منتجات العناية الشخصية وعضو مجلس إدارة الشركة، وممثل يونيسف في مصر، برونو مايس، وسفيرة النوايا الحسنة ليونيسف مصر، الممثلة دنيا سمير غانم، بالإضافة لعدد من الشخصيات العامة والإعلاميين.

لمَّا تعرف إن نص سكان العالم بيعانوا من تسوس الأسنان، و90% من أطفال المدارس بيعانوا من حفر الأسنان بسبب نقص مادة الفلوريد، 30 % من الناس في الفئة العمرية من 65 لـ 74 سنة ماعندهمش أسنان طبيعية، 40% من أسباب فقد الأسنان بيكون متمثل في التهاب اللثة، هتتأكد إن صحة الفم والأسنان أولوية مش رفاهية.

برنامج التوعية بأهمية الحفاظ على المياه والتغذية السليمة بيستهدف من خلالهم 1.5 مليون طفل أعمارهم من 6 لـ 11 سنة. الرقم كبير بس ممكن يوصلوا له ازاي؟ عن طريق إنهم شغَّالين على ثلاث محاور: أول حاجة، عن طريقة دعم الشركات المشاركة في الحملة، وأهمهم الشركة القابضة لمياه الشرب والصرف الصحي، ومساعدتهم لوجيستيًا  وتنظيميًا.

أما تاني استراتيجية هتستخدمها الحملة هتكون عبارة عن توعية المدرسين في مدارس المنيا والفيوم، عشان هما بدورهم يوعوا التلاميذ بأساسيات الممارسات الصحية والتغذية المتوازنة. آخر استراتيجية في الخطة عبارة عن بث حملة إعلامية على القنوات المختلفة وعمل منصة رقمية جديدة لنشر الوعي عن الصحة العامة بين حوالي 10 مليون مصري، خصوصًا الآباء. في البرنامج كمان هيبقى فيه وحدة متنقلة مجهزة بتضم مدربين متخصصين في نشر الرسائل الأساسية من خلال نشاطات تفاعلية بين الأطفال وأولياء الأمور ومقدمي الرعاية.

ممثل يونيسف في مصر، برونو مايس، كان حاضر حفل الإطلاق، وقال: "على الجميع العمل لضمان أفضل بداية لحياة صحية، وسعيدة، وآمنة للأطفال، مشيرا إلى أن شراكتهم مع شركة يونيليفر مشرق تعتبر إضافة مهمة لجهودهم لحماية الأطفال من المخاطر الصحية ولتعزيز السلوكيات الصحية الإيجابية بين الأطفال وأسرهم".

أما الفنانة دنيا سمير غانم، سفيرة النوايا الحسنة ليونيسف مصر، فماكتفتش بتقديمها فيديو غنائي قصير بيشجع الحملة، لكن كمان كانت حريصة على حضور المؤتمر، وقالت في كلمتها: "برنامج توعية الأطفال بالحفاظ على المياه والصحة والتغذية السليمة مهم جدًا، وده راجع لأربع أسباب. الأول هو توعية الأطفال بأهمية الاهتمام بالأكل الصحي، التاني هو  الحرص على ترشيد استهلاك المياه، والتالت هو أهمية غسيل الأيدي بصفة مستمرة نظرًا لمناعتهم الضعيفة، والرابع والآخير هو أهمية غسيل الأسنان" وأشارت لأهمية الحفاظ على نضارة أسنانهم وابتسامتهم على طول.

وفي نفس السياق، قال رئيس الشركة القابضة للمياه، ممدوح رسلان، في كلمته اللي ألقاها نيابة عنه اللواء هشام درة، رئيس مجلس إدارة شركة الفيوم لمياه الشرب والصرف الصحي، إن التعاون المستمر مع اليونيسف بيصب في مصلحة الطفل المصري، "يونيسف ليها مساهمات في المجتمعات الريفية، شملت التوسع في مد وصلات المياه فضلًا عن المشاركة في التوعية الصحية بالمنازل من خلال إيصال الرسائل التوعوية المهمة للجماهير، ونحن سعداء بأن يتواصل ذلك من خلال هذا البرنامج".

الحملة أطلقت هاشتاجات خاصة بيها على السوشيال ميديا (#TheirHealthTheirFuture - #صحتهم_مستقبلهم - #SignalxUNICEF) تقدر تتابع من خلالهم كل أخبار الحملة وتقرا نصايح وإرشادات تفيدك وتفيد صحة أطفالك وأسنانهم، كمان تقدر تكتب بنفسك على الهاشتاجات دي وتشارك في الحملة وتساعد أطفال كتير عشان يكونوا أحسن.