"ناكل الزلط".. 6 أكلات مصرية "أبو عوف" مابيغيرش فيهم حتى لو هيبوظولك الدايت
فلان بيعمل دايت وفلان دفع اشتراك الجيم وفلانة دي بطلت تفطر معانا كل يوم الصبح عشان بقت بتجيب أكل "هيلثي" من البيت. كل ده حلو، ولو تعرف حد بيعمل كده شجعه وماتضايقوش. كل مشاعري الإيجابية دي بتتحول لحسرة وحزن، لما بلاقي الشخص اللي بيحاول يحافظ على صحته، بيلعب في ثوابت الأكل، مافيش حاجة اسمها طعمية مشوية في الفرن ومافيش حاجة اسمها لحوم عضوية، زيت الزيتون حلو بس مش هنحطه في كل حاجة، والملوخية ماتنفعش من غير توم وكسبرة وتقلية.
قبل ما ثوابتنا تروح وهويتنا تتغير، قررنا نتكلم مع الشيف هاني من مطعم "أبو عوف" بفندق كونكورد السلام مصر الجديدة، عشان يحكيلنا أكتر عن أكلات مصرية أصيلة بيقدمها لزباينه ومابيقبلش حد يحرفله فيها.
راجع من بره تعبان ويومك كان طويل، بس شميت ريحة أنت عارفها كويس، اتسحبت واحدة واحدة لغاية المطبخ، في صينية كبيرة متغطية، بترفع الغطا وتلاقي إن ظنك كان في محله، النهاردة هتاكلوا مكرونة بشاميل، ولمدة كام ثانية بعد ما تكتشف اللي جوه الصينية بتلاقي عنيك نورت واحتمال دمعت! المكرونة البشاميل حدث يستحق الاحتفال فعلا.
المكرونة البشاميل ماتقبلش الهزار وماتقبلش إضافات زي جوز اللوز وجوز الهند ولبن نباتي وبشاميل دايت، دي كلها بدع وضلالات. "الأطباق المصرية دي لازم تنطبخ بالطريقة الصح، بالطريقة اللي ماما كانت بتعملها في البيت وإلا هيطلع طعمها مختلف ومش اللي أنت اتعودت عليه"، بيقولنا الشيف هاني صاحب الخبرة 21 سنة في المجال ده.
الفتة من الأكلات اللي ممنوع تحاول تقاومها. مكوناتها بتختلف حسب نوعها بس بتفضل مميزة وبتفضل ليها معزة خاصة عند المصريين ومكانة مهمة في المطبخ المصري. الشيف هاني متخصص في الفتة، وقبل ما ينضم لفريق "أبو عوف" طبخها كتير لزباينه في الخليج وشرم الشيخ، بيقولنا رأيه في طبق الفتة المصري: "أحسن طريقة للفتة هي المصري، اللحمة نفسها في مصر نوعيتها مختلفة، في الإمارات مثلا بيستخدموا اللحوم الأسترالية، احنا هنا بنعملها بلحمة بلدي".
رز ولا فريك؟ مش مهم، المهم تجرب الحمام المحشي زي ما هو وماتحاولش تستبدل الرز والفريك بحاجة تانية تشتغل مع الدايت، لما تقرر تضرب حمام يبقى تديله حقه! الشيف هاني بدأ يطبخ حمام في سن صغيرة، عشان كده بيديله مكانة خاصة، "بدأت أخش المطبخ وأنا عندي 9 سنين، ماكانش عندي أخوات بنات وقتها وكنت أنا اللي بساعد أمي في المطبخ" بيشرحلنا "هاني" اللي بيكون حاسس براحة وهو موجود في المطبخ.
الملوخية فوايدها كتيرة، بتحسن الهضم وبتوطي الضغط، بس سواء ليها فوايد ولا لأ، كده كده هناكلها. شيفات الأكل في "أبو عوف" بيتفقوا معانا وبيأكدوا إن طبق الملوخية مفضل بالنسبة للزباين. الملوخية أصلا وصلت لمصر عن طريق الدولة العثمانية وهي صحية متقلقش منها، بس ماتحاولش تجود وتستغنى عن حاجة من مكوناتها، هيفوتك كتير. الملوخية معروفة في الدول العربية، بس كل بلد ليها طريقة، بيشرح لنا "هاني": "الطريقة هنا مختلفة عن الطريقة في سوريا ولبنان مثلا، هناك بتكون الملوخية ناشفة أكتر والورق ممكن يكون مش متخرط".
المحشي أصلا أكلة تركي بس هو الوجبة المفضلة لغالبية المصريين. والمحشي زيه زي الحمام المحشي، بيتحشي رز بخلطة ولحمة مفرومة وحاجات كلها دهون وزيوت تعوضك عن أي مشاكل قابلتها في يومك وتخليك مستعد للي هتواجهه في اليوم اللي جاي. الشيف هاني رغم إنه لف كتير واشتغل مع شيفات أجانب، بس أطباقه المفضلة كلها من المطبخ المصري، وطبعًا منها المحشي اللي بيقدمه لزباينه في "أبو عوف" بالطريقة اللي بيحبها، بيقولنا: "المصريين بيعملوا الحاجة بشكل مختلف، مش لازم كل المطابخ التانية تبقى شبه المصري، بس أكيد المصريين بالنسبة لهم دي أحلى حاجة زي ما الشوام بالنسبة لهم المطبخ الشامي أحلى حاجة".
البامية ممكن تنطبخ بطريقة صحية جدًا وبسعرات قليلة، وممكن تبقى بامية ويكا مصرية جميلة وبعد ما تاكلها ابقى انزل اجري ساعة وكفر عن غلطك. الشيف هاني بيعرفنا السر في البامية: "السر في اللحمة الضاني الطازة والبامية الطازة، غير كده إن الأكلة تكون مطبوخة بحب وده اللي بنهتم بيه في تيم "أبو عوف" فبيخرج الأكل حلو".
ماجوعتش؟ أنا جوعت!
