لو بتقف قدام المراية من وأنت صغير وبتفكر تبقى ممثل وبتفضل تقلد في اللي بتشوفه في التليفزيون، يبقى الليست دي معمولة ليك، عشان التمثيل مش مجرد موهبة ولا كتابين تقراهم، لكن دراسة ومجهود وتعليم، دي ورش تمثيل ممكن تحضرها بأسعار مختلفة ومع ناس مختلفة ومنها اللي بيحصل مرة واحدة ومنها اللي بيحصل في أماكن لو تابعتها هتلاقي فيها ورش بشكل مستمر. خليك فاكر حاجة مهمة، المدرب الشاطر مش لازم يكون ممثل معروف، والممثل المعروف مش لازم أبدًا يكون مدرب شاطر

ورشة أحمد مبارك لإعداد الممثل

أحمد مبارك اتخرج من معهد فنون مسرحية في 2014، وبيشتغل مدرب تمثيل في أكتر من مكان وورشة، الورشة هتكون في جاليري "حيفا" في وسط البلد، يومين في الأسبوع وبـ2500 جنيه.

ممكن تعرف التفاصيل وتقدم من هنا

ورشة التمثيل مع محمد رحمو

محمد رحمو هو مدرب تمثيل أردني، درس في معهد ميسنر في لوس أنجلوس، واستيلا أدلر ستوديو في نيويورك، وأسس ستديوهات مختلفة للتمثيل. الورشة مدتها 3 شهور ومرة أسبوعيًا، ومكانها "سيما" في جاردن سيتي، وممكن تقدم من هنا.

ورشة ستديو ذات مع شادي خلف

الورشة بتكون في ستديو "ذات" اللي أسسسه "شادي" في مصر الجديدة، وبتتعلم فيها مبادئ التمثيل كلها، يمكن مفيش ورشة بتحصل حالًا، بس باستمرار ستديو "ذات" فيه ورش تمثيل وورش مختلفة تانية، وممكن تقدم من هنا.

ورشة إعداد الممثل مع محمد عادل

محمد عادل درس مسرح وأخد دبلومة من جامعة "فالكنبرج" بألمانيا وحصل على جوائز خاصة في الإخراج من المركز الثقافي الفرنسي، وتكريم من معهد جوتة، وآخر أعماله كان تأليف مسرحية "الجريمة الكاملة" من إنتاج السفارة الأمريكية بالقاهرة. الورشة هتكون في الركن النوبي في شبرا ولمدة شهر ونص مرتين في الأسبوع وقيمتها 1000 جنيه.

ممكن تعرف التفاصيل وتقدم من هنا 

ورشة التمثيل مع محمود الجندي

محمود الجندي غني عن التعريف، والورشة دي في أكاديمية "الجيل الثالث للسينما" في الهرم، لسه مافيش مواعيد ثابتة ليها حسب الحجز، لكن ممكن تعرف تفاصيل أكتر من نمرتهم  أو الإيفنت من اللينك ده.

ورشة اليوم الواحد مع محمد عادل *غير الأولاني*

ميزة الورشة دي إنك لو مش فاضي أو مشغول هتقدر تستفيد، بس ده مش كافي ولازم تستمر بعدها، لكن كنظرة أولى ممكن تجربها وخصوصًا لو مع ممثل شاب شاطر زي محمد عادل، اعرف تفاصيل أكتر من هنا.

ورشة التمثيل للأطفال

الورشة دي متخصصة للأطفال من سن 9 سنين لـ16 سنة، عشان تعلمهم التمثيل والارتجال والتدريب الصوتي والحكي، وهي عبارة عن 10 محاضرات برسوم 2000  جنيه، ممكن تعرف أكتر عنها من هنا.