• اكتب معانا
  • ماتنسناش
  • تابعنا
الموضوع اللي جاي
الأمومة والطفولة: 2000 مكالمة يوميًا للمشاركة في حملة "أنا ضد التنمر"
الموضوع اللي فات
المياه والشرب: استهلاك الفرد المصري من المياه 300 لتر يوميًا

10 أصوات ظلمتها برامج المسابقات والحُكام وتصويت الجمهور

مين ظلم ومين اتظلم؟
برامج المسابقات

برامج المسابقات اللي بتختار 50 ألف صوت كل موسم وتبدأ تفتلرهم، عشان يتبقى واحد في النهاية هو الفائز بـ لقب الموسم، بيبقى عندها خطوات ومعايير بتمشي عليها وبيتحدد على أساسها اختيار الموهبة، برنامج زي "أراب أيدل" بيعتمد على إن الصوت لوحده مش كفاية، اللي بيتقدم لازم يبقى عنده حضور وطلة ويبقى مالك المسرح، ده على عكس برنامج "The Voice"، اللي شعاره "الصوت وبس"، عشان كده الحُكام مابيشوفوش اللي بيغني غير لما بيختاروه، بس في النهاية أي برنامج بيعتمد على تصويت الجمهور في الحلقات النهائية، حتى لو في مرحلة من المراحل، بيبقى مشوار المتسابق متوقف على كلمة أو قرار من الحَكم.
أصوات كتير ظلمها قرار من لجنة الحكام، أو تصويت الجمهور مأنقذهمش، أكيد هما أصوات كتير بس حاولنا نجمع أحسن أصوات منهم:

من برنامج "The Voice":

1- سيمور جلال

من الأصوات النادرة اللي غنت "لما أنت ناوي" بعظمة، وبعدها دخل مرحلة المواجهة بـ "سيبوني يا ناس" مع منافس لِيه في نفس الفريق، وتم اختياره من لجنة الحكام عشان يكمل لنهاية المسابقة، بس ظلمه تصويت الجمهور في الحلقات المباشرة.

حلبات المواجهة في برنامج "The Voice"من أكتر الحاجات اللي بيتعرض المتسابقين فيها للظلم، لإن عشان يتم اختيار صوت يكمل، بتضطر تفضله على صوت تاني، حتى لو الاتنين في نفس المستوى أو الصوتين حلوين، الأمثلة مش كتير بس منهم:

2- ولاء الجندي
أكتر مرحلة مواجهة حصل فيها ظلم عدت على كل مواسم "The Voice"، لإن أداء "ولاء" في اغنية خانات الذكريات ماقلش عن أداء "محرزية"، بالعكس كان أحسن بكتير بالنسبالي، وخرجت ولاء من مرحلة المواجهة بعد اختيار محرزية.

3- حنين القصير 
في الموسم التاني دخلت في السباق بأحلى أغاني ذكرى "يا حبيبي"، ولفتت انتباه الحُكام بأدائها للأغنية دي. في مرحلة المواجهة تفوق عليها مهفان صالح، اللي كان يستحق أكيد الفوز. لكن في النهاية الصوتين ماحدش فيهم فاز أو كمل للأخر، والصوتين مما لا شك إنهم اتظلموا.

ومن مرحلة المواجهة للعروض المباشرة أو الحلقات النهائية، اللي مابيكُنش للحكام إيد في اختيار حد فيها، بيبقى العبء على الجمهور يختار ويصوّت للصوت اللي شايفه يستحق، بس مش دايمًا التصويت بيكون منصف، من اللي اتظلموا بسبب تصويت الجمهور: 

4- غسان بن ابراهيم
بدأ باللفة الرباعية من الحكام، بأغنية "قالوا حبيبك مسافر" وقدم أداء ماحصلش، ووصل لـ مرحلة المواجهة ومنها اتأهل للعروض النهائية المباشرة، لكن الحظ وتصويت الجمهور ماقدروش يوصلوه للقب اللي يستاهله.

5- رحاب صالح
مشوارها في برنامج "The Voice"زي مشوار غسان، غنّت قدام الحكام "الله غالب" وكانت مستخبية في ستارة بيضا، عشان ماحدش يشوف وشها غير لما تخلص غُنا وقالت في برنامج إنه كان نوع من التشويق للجمهور ولجنة التحكيم. صوت "رحاب" شبيه جدًا لطبقة صوت "ذكرى"، وده اللي كان سبب مهم في اختيارها من قِبل الحكام حلقة ورا حلقة، لحد ما قدرت توصل لـ العروض المباشرة برضه، بس الجمهور كان له كلمة تانية.
بعيدًا عن برامج المواهب، فهي بتغني لسه بس مأخدتش حقها في انها تتعرف كفاية. 

من "The Voice" لنفس نسخة البرنامج بس للأطفال، فيه أصوات مأخدتش حقها، وهما أكيد كتير بس من أهمهم:

6- جنة الجندي
"مضناك" بالنسبالي من أصعب الأغاني، وبتبقى محتاجة صوت متمكن وحلو، بعد الأداء اللي قدمته "جنة" قدرت تخلي كل الحكام يلفوا كراسيهم ليها، وانتقلت لمرحلة المواجهة وقدمت أحسن أداء لـ "أسمر يا أسمراني"، وتأهلت للمرحلة النهائية وغنت "يا مسهرني" في اللايف، وطبعًا كان أداء جميل رغم إنه من شابة صغيرة، جنة خرجت من المنافسة بس هي موهبة كبيرة وهيبقالها اسم.

7- يمان قصار
أحسن Cover لـ"جاءت معذبتي" تسمعها من "يمان"، أداء يبهرك ويحسسك إنه مش طالع من طفل أبدًا، لفة ثلاثية من الحكام في لحظة واحدة. اتحط في مواجهة مع تيم الحلبي اللي مايقلش موهبة عنه، وتم اختيار "تيم"، رغم إن الإتنين موهبتهم مميزة إلا إن الظلم ده كان من لجنة الحكام اللي قررت تحطهم في مواجهة واحدة.

8- سيد مصطفى
كان من نجوم ستار ميكر، وفاز في المرحلة التانية بعد ما صوّت له 3 من لجنة الحُكام. "سيد" اتأهل للتصفيات النهائية، بس ماكسبش ومن وقتها اختفى، ولحد النهاردة فيه كام تعليق بيتكتبوا على أغانيه، بيطالبوا برجوعه، من أشهر أغانيه: "ماتقلبش المواجع".

9- سعد رمضان
من أهم الأصوات اللي كانت موجودة في الموسم الخامس من ستار أكاديمي، ووصل للتصفيات النهائية، بس اللي فاز باللقب التونسي نادر قيراط. "سعد" دلوقتي مغني معروف ومهم وله أغاني حلوة، لكن ده مايمعنش إنه وقتها تصويت الجمهور ظلمه.

10- شريف عبد المنعم
في برنامج "العندليب من يكون؟" اللي اتعمل عشان يتم اختيار موهبة تقوم بتمثيل شخصية عبد الحليم، كان مطلوب من المتقدم إنه يكون بيغني في المرتبة الأولى.
تم اختيار شادي شامل في النهائيات واللي ساعد في ده شبهه لعبدالحليم، ومثل المسلسل وربنا كرمه، لكن مع الرجوع لكل المتسابقين، كان فيه صوت مايتنسيش وهو صوت "شريف"، كان صوت عظيم ويستحق. هو لسه موجود وبيغني في حفلات الأوبرا.

Home
خروجات النهاردة
Home
Home