• اكتب معانا
  • ماتنسناش
  • تابعنا
الموضوع اللي جاي
افتتاح قسم كتب سهلة القراءة لخريجي محو الأمية في مكتبة إسكندرية
الموضوع اللي فات
"في مستوى الطالب المتوسط": ٧ روايات إنجليزي تقراهم بسهولة

حميد الشاعري.. "كابو" التمانينات اللي غير شكل المزيكا في مصر

.
بدايات حميد الشاعري

في حوار ليه مع برنامج "بوضوح"، سأل المذيع عمرو الليثي، ضيفه حميد الشاعري عن رأيه في موسيقى المهرجانات، بيجاوب "حميد" بحسم: "بحبهم جدًا، شباب ومهيبرين وبيعملوا حاجة مختلفة، هما ناقصهم كلمات بس عاوزهم يفضلوا زي ما هما، واتمنى إني ألحنلهم حاجة أو اعمل دويتو معاهم".

إجابة حميد الشاعري كفيلة تفهمك ليه الشخص ده هو أكتر واحد طور المزيكا في مصر من بعد بليغ حمدي، عشان هو مختلف وبيستوعب الاختلافات وبيحاول يفهمها ويجاريها، لدرجة إنه حاليًا يقعد في بيته عشان يقدر يفهم التطورات التكنولوجية ويواكب الدنيا اللي بتجري من حواليه.

النجاح يلزمه فشل

أوائل التمانينات، دي فترة انتقالية في المزيكا، الانتقال من عصر عبد الحليم وأم كلثوم اللي عملوا فجوة في المشهد الموسيقي بعد وفاتهم، لعصر الأغنية القصيرة والتوزيعات الموسيقية المختلفة وتغير شكل الأغنية التقليدية وصناعة نجوم جدد هيحتلوا المشهد 30 سنة قدام. ليبيا مش بلد بتسمع كتير فيها عن نجوم ومشاهير، بيقولوا القذافي كان بيحرص دايمًا على إنه يكون أشهر اسم في ليبيا، وعشان كده المشاهير فيها يتعدوا على الصوابع، بس ليبيا جابت للمزيكا حميد الشاعري.

بدأ حميد من عند النقطة اللي أي حد بيبدأ منها، الفشل. ألبوم أول –عيونها- فشل بجدارة؛ التوزيعات والموسيقى المختلفة، كل ده كان غير مفهوم أو غير محتمل في بدايته على الأقل بالنسبة للجمهور. قرر حميد يجرب حظه للمرة التانية وربما الأخيرة، مرة كمان بنفس الكلمات والمزيكا والتوزيعات غير المعتادة، يا صابت يا خابت، صابت وكسر ألبوم "رحيل" الدنيا، واحتل حميد، على صغر سنه، مكانته كنجم، بأغاني زي "رحيل"، "وين أيامك وين"، "يا صاحب"، وشارك في الألبوم فرقة يحيى خليل والموسيقار فتحي سلامة، وتكفل حميد بالتوزيعات كالعادة.

أصوات جديدة إيفري وير

في الفترة دي، بقى اسم حميد وتوزيعاته ضمان نجاح وبطاقة عبور أي مطرب، من ناحيته هو كان عنده قدرة رهيبة على تقديم أصوات جديدة، أو التعاون مع أصوات قديمة، والمساهمة في نقلها لمناطق مختلفة. بيقول عمرو دياب عن بداية تعاونه مع حميد الشاعري في أواخر التمانينات: "نقلني من منطقة إني ناجح لمنطقة تانية خالص إني مشهور وبتطلب في كل مكان". ده حصل مع عمرو ومع غيره، ويمكن عمرو كان معروف بشكل أكبر من ناس تانية حميد هو اللي قدمهم وزقهم بمزيكته، والقايمة هنا هتطول:

1- علي حميدة

مطرب "لولاكي"! أغنية علي حميدة اللي يقال إنها اتباع منها 6 مليون نسخة. الأغنية اللي كسرت الدنيا وكانت أول وآخر بخت على حميدة، كانت توزيع موسيقي لحميد الشاعري.

2- مصطفى قمر

مصطفى قمر بيحكي إن حميد اتعرف عليه بالصدفة، لما كان الأول بيغني على شط في إسكندرية، وساعتها حميد طلب منه يروحله بيته في القاهرة. بيحكي "مصطفى": "دخلت البيت عنده وقعدت أغني شوية، بعدها سمعت زغاريد، سألته إيه ده؟ قالي ده الاحتفال عندنا في البيت، أنت كده عديت". عدى مصطفى قمر اختبار حميد الشاعري، وعداه حميد للشهرة ووصله لشركة الإنتاج الأولى اللي اشتغل معاها المطرب الصاعد، وقدمله ألحان وتوزيعات ثبتت مكانة مصطفى قمر وسط جيله.

3- إيهاب توفيق

سنة 91 كان أول ألبوم لإيهاب توفيق، ألبوم "اكمني" حقق نجح كبير وكمل بعده إيهاب لحد النهاردة ووصل لأكتر من 18 ألبوم. بدايات إيهاب كانت مع حميد الشاعري، اللي هتلاقي اسمه أكتر حاجة متكرر في غلاف شرايط إيهاب.

4- هشام عباس

أول ما الناس سمعت هشام عباس، سمعته على شرايط مكتوب عليها اسم فريق "أمريكانا شو" اللي كان مكون من هشام وعليا وأحمد الجبالي، وطبعًا هتلاقي اسم حميد معاهم. هشام أصلًا كان مهندس صوت وبيحكي إن حميد اتعرف عليه بالصدفة لما كان بيصور أغنية "جلجلي" في الستديو، وطلب من هشام إنه يظهر معاه في الكليب وينطط ويرقص، بعدها عرض حميد على هشام إنه يغني أغنية "الله يسلم حالك" وانطلق هشام عباس وكمل معاه حميد بألحان وتوزيعات وأغاني كل لما تشوفها هتفتكر فترة التسعينات.

5- حكيم

الحكاية بتقول إن حميد سمع حكيم في فرح وقاله بص أنت هتغني شعبي وعرفه كمان على شركة الإنتاج اللي عملتله أول ألبوم ليه. قبلها حكيم عمره ما فكر يغني شعبي، وبعدها حكيم بقى واحد من أهم الناس اللي بتغني في المنطقة دي.

6- فارس

هو اختفى ليه؟ بس بداياته وشهرته وأغانيه اللي نجحت كانت كلها مع حميد، من أول سنة 87 وألبوم "هكتبلك" وألبوماته اللي بعد كده، "أنتي" و "سحرك" و "معجباني".. إلخ، حصل إيه بعد كده؟ ماتعرفش

7-  حمادة هلال

قبل ما الناس تقطع شرايينها على صوت تامر عاشور، كانوا بيقطعوها على صوت حمادة هلال زمان شوية. بدايات حمادة هلال كانت مع الموسيقي حسن إش إش وهو اللي أخده وقدمه لحميد، وحميد كمل المهمة واشتغل مع حمادة ووصله لشركة إنتاج هاي كواليتي، اللي قدمت حمادة في ألبومات كوكتيل مع مجموعة من المطربين الشباب، واللي كان حميد الشاعري هو الاسم المشترك في كل أغانيهم تقريبًا.

8- راندا

ماحدش هيفتكر إن راندا غنت فترة في فرقة "المصريين"، رغم شهرة "المصريين"، لو حد فاكرها هيكون فاكرلها أغنية "مجنونة بيك" اللي عملتها مع حميد الشاعري وبقت نجمة سنة 88، بعدها اختفت ويمكن ماظهرتش تاني غير في 2015 في حلقة "صاحبة السعادة". بتحكي راندا إن حميد سمعها صدفة وعجبته جدا، فمارس هوايته فإنه يعمل أغنية لحد مش معروف ويحوله لسوبر ستار.

9- داليا

"أنا بحبك أنت بحبك زي ما أنت"، فاكر الأغنية دي أو فاكر اسم صاحبتها؟ لو مش فاكر فدي تبقى داليا اللي جات من المنصورة على القاهرة، بعد ما سمعها حميد الشاعري وعجبه صوتها وقالها تعالي فورًا. كمل حميد مع داليا وقدمها لشركة "هاي كواليتي" واشتغل معاها على أول ألبوماتها. داليا برضه ماظهرتش من وقتها غير في حلقة مع إسعاد يونس.

حميد ماوقفش عند حاجز التمانينات والتسعينات، وكمل في الألفينات هوايته في الشغل مع الأصوات الجديدة وتنجيمهم، فخرج من تحت إيده ناس زي "هيثم شاكر"، "شذى"، "شاب جيلاني"، "محمد نبيل"، "مصطفى شوقي" وغيرهم.

 اختلاف حميد وتميزه كان جزء كبير منه قايم على احترامه، احترامه للمواهب لدرجة إنه يتنازل عن لحن عاجبه لمطرب لسه صاعد عشان يزقه. احترامه لنفسه لما يبطل يعمل حفلات عشان شايف إنه كبر ومايقدرش يطلع يتنطط على المسرح ويكفيه إنه يساعد الأصوات الجديدة. احترامه للزمن وللتغيير، اللي خلاه زمان يقرر يجازف ويقدم للناس حاجة مش متعودين عليه، وبعدها ب30 سنة تاني يقرر إنه محتاج يدرس التكنولوجيا ويشوف ويسمع ويتمنى يشتغل مع بتوع المهرجانات اللي جايز تكون الناس بتشتمهم دلوقتي زي ما شتمته هو نفسه زمان.

الفيديو والدويتو

حميد بيحب يغني مع الناس اللي بيحبهم، الموضوع مش تجاري ولا تسويقي ولا أي حاجة، الموضوع بهذه البساطة بس. قاعد مع منير بيسمعوا أخبار انفجار مفاعل تشيرنوبل فقالوا يلا نعمل دويتو، فبقت أغنية "أكيد". داخل الستديو يصور أغنية فلقى واحد جوه اسمه هشام عباس، فقاله ما تيجي تظهر في الكليب ونرقص سوا؟ فظهر هشام في كليب "جلجلي" وعمل حميد دويتوهات بعدها ما هشام في أغاني "حلال عليك" و "عيني".

سيمون بنت حلوة وشبه مادونا ولسه طالعة، أحب جدًا أغني معاها ونعمل دويتو "بتكلم جد".

 

وشراكات تانية مع علاء عبد الخالق ومصطفى عمر وناس طلعت فترة واختفت زي "أميرة" وفرقة "جيليانا".. إلخ، لغاية إعلانه ترحيبه بعمل دويتو مع مطربين المهرجانات لو جات فرصة وإنه يعمل دويتو مع واحد جديد زي محمد قماح.

إلى جانب الدويتوهات، الفيديو من الحاجات اللي وثقت تجربة حميد الشاعري، وبينت التغييرات اللي أدخلها على الأغنية. الكليب في مجمله مالوش قصة ولا غرض غير إن اللي بيغني يتبسط واللي يتفرجوا على الكليب يتبسطوا وفرفشوا يا جماعة احنا في رحلة. كليبات مش متقنة بصريًا وفي الغالب مالهاش قصة واضحة، بس في ألوان كتير وتنطيط ورقص، شكل ماحدش عمله غير حميد الشاعري ولسه ممكن تتفرج على الكليبات دي ولسه هتتبسط.

 

السينما.. مش مكانك المفضل

في السينما ماقدمش حميد تجارب كتير، الموضوع اقتصر على تجربتين، "قشر البندق" و "أيظن". لجوء حميد للسينما أصلًا كان بسبب إيقافه عن العمل لمدة 4 سنين من النقابة، لسبب حميد نفسه مش عارفه لغاية دلوقتي حسب كلامه، حاول حميد يتحدى القرار ويفضل يشتغل، لكن ده زود المشاكل مع النقابة ووصلها للمحاكم، وعليه كان لازم يشوف سكة تانية، فشارك في فيلم خيري بشارة "قشر البندق". الفيلم نجح جماهيريًا لما اتعرض في التلفزيون، الناس حبته حتى لو مافهمتش الرمزية الكتير اللي فيه. التجربة التانية كانت مجاملة زي ما قال عنها "حميد"، فيلم تعبان هتلاقي معظم نجومه بيتبروا منه. في المجمل حميد مالوش تجربة في السينما ممكن تتقيم، لكنه دخلها على حس شهرته كمطرب وملحن وموزع، لا ضافلها ولا ضافتله.

النهاية؟

لما ظهرت صورة لعمرو دياب مع حميد الشاعري، اتقال إنها جلسة بينهم عشان هيرجعوا يشتغلوا مع بعض تاني، كنت مستني الأغنية تنزل كواحد شايف إن عمرو دياب اعتزل من 15 سنة مثلا، بس لو في أمل إنه يرجع من الاعتزال، حميد هو اللي هيرجعه، وكواحد مستني يشوف شغل حميد من تاني، مانزلتش الأغنية في الألبوم، وألبوم حميد اللي بقاله كذا سنة بيتكلم عنه شكله مش نازل قريب. حميد على كبر سنه وخبرته والطفرة اللي عملها، هو لسه شايف إنه محتاج يتعلم ويفهم حاجات جديدة ومعتكف عشان ده مخصوص، ياريت نشوف نتيجة العلام ده قريب، بس سواء شوفنا أو ماشوفناش، المزيكا في مصر هتتقسم لفترة ما قبل حميد وما بعد حميد.

Home
خروجات النهاردة
Home
Home