• اكتب معانا
  • ماتنسناش
  • تابعنا
الموضوع اللي جاي
QUIZ | إيه الأغنية اللي بتعبر عنك من ألبوم عمرو دياب الجديد؟
الموضوع اللي فات
منع بيع الدواجن الحية بسبب إنفلوانزا الطيور

8 أفلام اتعرضت بعد منعها من الرقابة

امنع امنع ده اللي علمهولك في بلدكم

 أي فيلم بيمر بمراحل عشان إجازة عرضه، مادام هيتم إنتاجه في مصر، من ضمنها عرض السيناريو على هيئة الرقابة على المصنفات. لما بيتم الموافقة على السيناريو وكتابته بيتم التصوير، تصاريح للتصوير من وزارة الداخلية وشغل كتير وفي الآخر بيرجع الفيلم تاني للرقابة في صورته النهائية عشان يوافقوا عليه ويتم السماح بعرضه.

فيه أفلام كتير تم منعها في مصر، لأسباب أخلاقية أو سياسية أو دينية أو حتى من غير سبب ومن غير ورقة تثبت إنه تم منعهم، بس فيه أفلام تم منعها لفترة وبعدين تم إجازة عرضها عشان تغيير حصل في الظروف، وده جزء منها

لاشين 1938

احنا بنمنع الأفلام من زمان، الفيلم اتعرض عرض أول في سينما "ديانا" وبعدها تم سحبه من السينمات بقرار ملكي ومنع كل نسخه، الفيلم بيتكلم عن "لاشين" اللي كان قائد جيش لحاكم فاسد حاول تنبيهه لمحاولات الانقلاب، لكن هيتم حبس "لاشين" وهيحصل ثورة جياع هتطيح بالحاكم، الفيلم تم تغيير نهايته واكتفوا بإخراج "لاشين" من السجن بدل من الإطاحة بالحاكم اللي كانت النهاية الأصلية.

عنتر ولبلب 1952

فيلم بطولة سراج منير وشكوكو تم عرضه في 1952 وبعد أيام من عرضه تم منعه وسحبه من دور السينما، وبعدين تم دبلجة اسم "شمشمون" وتغييره باسم عنتر، وبقى هو ده اسم الفيلم الجديد، محدش عارف القصة الحقيقية وراء تغيير الاسم لكن الكلام اللي بيتردد إنه بسبب إن اسم "شمشمون" هو اسم شخصية يهودية والفيلم فيه إسقاط على إسرائيل.

العصفور 1972

الفيلم إنتاج سنة 1972 وإخراج يوسف شاهين وبيتكلم عن ما بعد 1967، الهزيمة ووجعها وصرخة بهية وهي بتقول: "هنحارب"، الفيلم تم منعه من الرقابة وتم السماح بعرضه بعد انتصار أكتوبر 1973.

الكرنك 1975

الفيلم عن رواية كتبها نجيب محفوظ 1974 وبتتكلم عن اللي حصل بعد ثورة يوليو والمعتقلات السياسية، وتم تحويله فيلم وإنتاجه سنة 1975 من إخراج علي بدرخان، لكن وزير الثقافة وقتها يوسف السباعي أصدر قرار بمنع الفيلم عشان بيسئ لفترة حكم عبد الناصر وبعد الثورة. ممدوح الليثي المنتج طلب مقابلة السادات اللي بدوره طلب يتفرج على الفيلم ووافق على العرض، وتم إهداء جزء من إيرادات الفيلم للقوات المسلحة.

المذنبون 1975

الفيلم ده مفيش فيلم هينافس اللي حصله، الرئيس المصري السادات اتقدم بشكوى رسمية ضد مدير الرقابة عشان سمح بعرض الفيلم، وتم جرهم فعلًا للمحاكمة واتمنع عرض الفيلم اللي بيحكي عن قضية قتل بتفتح ملفات الفساد في مصر في فترة ما بعد الانفتاح. الفيلم تأليف نجيب محفوظ وإخراج سعيد مرزوق. تم السماح بعرض المذنبون في التليفزيون بعد حذف بعض المشاهد، ومؤخرا تم السماح بعرضه بالكامل.

درب الهوى 1983

الفيلم اللي تم إصداره سنة 1983 بعد عرضه بـ6 أسابيع تم سحب ترخيصه من دور العرض بحجة إنه فيه خدش الحياء، الفيلم بيتكلم عن حسن عابدين اللي كان وزير ورئيس حزب بينادي بغلق بيوت الدعارة لكن هو بيتردد عليها، وبعد 8 سنين في سنة 1991 تم تجديد ترخيص الفيلم وبقى بيتعرض والناس عرفته بالجملة الشهيرة "أنا عايز واحدة تهزقني، تهزقني".

خمسة باب 1983

الفيلم بطولة نادية الجندي وفؤاد المهندس، وبعد أسبوع من عرضه تم سحبه ومنع عرضه رغم صدور تصريح الرقابة ليه، واتعرض المنتج لخسائر كبيرة وده اللي خلاه يرفع قضية استمرت في المحاكم 8 سنين ولما كسبها رفضت دور السينما عرض فيلم قديم، فاكتفى المنتج ببيعه للقنوات الفضائية.

البرئ 1985

الفيلم المشهور بطولة أحمد زكي وتأليف وحيد حامد وإخراج عاطف الطيب، وحيد حامد استوحى قصة الفيلم من أحداث حقيقية حصلت وقت انتفاضة يناير في السبعينات، واللي بتتكلم عن أحمد سبع الليل الشاب اللي بيقضي خدمته العسكرية في المعتقلات ومقتنع تمامًا إن كل اللي فيها بيخربوا البلد لحد ما يقابل صديق قديم ليه ووقتها بيدرك إن مش كل اللي في المعتقل بيخربوا البلد.

الفيلم عمل مشاكل كتير وقت عرضه لكن تم الموافقة عليه بعد حذف مشهد النهاية بعد تشكيل لجنة بتضم وزير الدفاع ووزير الداخلية ووزير الثقافة وقتها، لكن في 2005 وافق فاروق حسني وزير الثقافة وقتها على عرض الفيلم لأول مرة بنهايته الأصلية وكامل. 

لسه فيه أفلام بيتم منع عرضها وبيجاز بعد وقت، بس أحيانًا كتير بيكون عشان نعمل دوشة بس، زي ما حصل مع فيلم "كارما" اللى وزيرة الثقافة اتدخلت وتم عرضه بعدها، وفيه أفلام مابيطلعش ورقة من الرقابة أصلًا برفضها زي ما حصل مع "آخر أيام المدينة".

Home
خروجات النهاردة
Home
Home