أفضل أفلام 2018

خلينا نتفق إن السنة دي من أضعف السنوات الإنتاجية للأفلام العربية، ورغم إن بقى عندنا مهرجانين مهمين هما الجونة السينمائي والقاهرة الدولي السينمائي، لكن لسه الأفلام العربية مش هي أقوى منافس. الليست دي فيها أفلام يمكن ماتكونش الأعظم فنيًا بس هتذكر إنها من أهم أفلام 2018، والترتيب لا يحمل أي معنى.

يوم الدين

فيلم مصري شارك في المسابقة الرسمية في مهرجان كان السينمائي، وقتها كان أغلب المصريين أول مرة يسمعوا عن أبو بكر شوقي المخرج اللي بعد كده اتردد اسمه كتير، خصوصًا مع فوز الفيلم بأفضل فيلم عربي في مهرجان الجونة السينمائي وعرضه على هامش مهرجان القاهرة. الفيلم بيحكي عن متعافي من الجذام بيقرر يسيب المستعمرة ويدور على أهله، بطل الفيلم راضي جمال هو متعافي من الجذام وأول مرة يمثل ومبيعرفش يقرأ ولا يكتب وده ادى الفيلم مصداقية وحاجة مميزة.

ممكن تعرف رأينا أكتر في الفيلم من هنا، أو تقرأ الحوار مع أبطاله من هنا.

تراب الماس

أي حد بيتابع سينما بيستنى أفلام مروان حامد، ممكن عشان ينقدها أو عشان يتعلم منها بس في النهاية هو مخرج مميز وبيعمل أفلام مش موجود زيها كتير على الشاشة، الفيلم ده عن رواية أحمد مراد المشهورة اللي بتحكي عن شخص بيقتل عشان الخير، طبعًا غول الفيلم وبطله وأهم حد فيه هو ماجد الكدواني.

ممكن تعرف رأينا أكتر في الفيلم من هنا، أو تقرأ الحوار مع أبطاله من هنا.

كفر ناحوم

حتى لو مش متابع جيد للسينما اللبنانية، ممكن تكون سمعت عن نادين لبكي المخرجة والممثلة اللبنانية، الفيلم عن طفل صغير بيرفع دعوة قضائية ضد أهله عشان جابوه للدنيا أصلًا وسط المآسي في البلاد العربية. كسب الفيلم جائزة لجنة التحكيم في مهرجان كان السينمائي، ومترشح لأفضل فيلم أجنبي في الجولدن جلوب.

زهرة الصبار

الفيلم ممكن مايكونش الأفضل ولا اللي يعجبك، بس الأكيد إنك هتحس إنه تجربة مختلفة، العرض الأول ليه كان في مهرجان روتردام السينمائي واترشح لجائزتين، وبيحكي عن 2 ستات الظروف جمعتهم عشان يدوروا على مأوى ليهم.

ليل خارجي

3 سنين بيحضر فيهم أحمد عبدالله  فيلمه، 3 سنين واحنا مستنيين، أحمد عبدالله اللي بدأ مسيرته بفيلم ميكروفون هو مخرج مختلف وبنستنى أفلام عليها اسمه، الفيلم اللي اتعرض في مهرجان القاهرة السينمائي والقاعة كلها فضلت تضحك وتصقف، المرة دي أحمد عبد الله بيشتبك مع الجمهور العادي اللي بيستنى فيلم يضحك فيه، ظروف جمعت "مو" المخرج اللي الظروف جمعته بسواق تاكسي و"توتو" فتاة الليل، وليلة واحدة في القاهرة وريتنا كل طبقة بتفكر ازاي وممكن يجمعهم مواقف شكلها إيه؟

شريف الدسوقي اللي عمل دور "سواق التاكسي" فاز بجائزة أحسن ممثل في مهرجان القاهرة السينمائي.

بلاش تبوسني

الفيلم مانجحش جماهيريًا، وهو التجربة الإخراجية الأولى لأحمد عامر اللي كتب "علي معزة وابراهيم"، الفيلم ساخر بينتقد مفهوم "السينما النظيفة" من خلال قصة "فجر" الممثلة اللي بترفض تعمل مشهد "بوسة"، الفيلم بيبالغ في كل المشاهد، الرفض والقبول والضحك والهزار، وده سر حلاوته واختلافه.

ممكن تقرأ حوارنا مع صناعه من هنا

يوم أضعت ظلي

فيلم سوري عن أم عايشة لوحدها مع ابنها اللي عنده 9 سنين وجوزها بيشتغل بره سوريا، وبسبب البرد بتخرج تدور على أنبوبة غاز وبتلاقي نفسها بتواجه آثار الحرب في الشارع وبتتوه 3 أيام في شوارع دمشق، الفيلم فاز بجائزة أفضل عمل أول في مهرجان فينسيا السينمائي.

ريح رباني

هو فيلم جزائري كان عرضه الأول في مهرجان تورنتو السينمائي، الفيلم عن شاب وشابة اتطلب منهم تفجير قاعدة استخراج بترول، "نور" البطلة انضمت لداعش بعد ما سافرت تركيا وسوريا.

ورد مسموم

هو الفيلم الروائي الطويل الأول للمخرج أحمد فوزي صالح، الفيلم تجربة مختلفة، مش هتفهم هو روائي ولا وثائقي ولا إيه؟ ورغم إن النقاد كتبوا فيه شعر وكسب 3 جوائز في مهرجان القاهرة السينمائي، وهي أحسن فيلم عربي وجائزة لجنة التحكيم الخاصة وجائزة صندق الأمم المتحدة للشباب، لكن الجمهور كان ليه رأي تاني، ومش كل الناس عجبها الفيلم اللي بيحكي عن بنت بتحاول تمنع أخوها من الهجرة غير الشرعية.

ممكن تقرأ عن رأينا في الفيلم من هنا

مفك

فيلم فلسطيني وهو الفيلم الأول لمخرجه، بيتكلم عن أسير فلسطيني بعد خروجه من السجن، وازاي ده آثر على حياته كلها حتى بعد خروجه، الفيلم اتعرض في مهرجان الجونة السينمائي ومهرجان فينسيا.

ولدي

فيلم تونسي شارك في مهرجان برلين السينمائي، وإخراج محمد بن عطية اللي أخرج فيلم "نحبك هادي"، الفيلم بيتكلم عن شاب بيقرر ينتمي لداعش، وازاي المشكلة اللي بقت موجودة في كل البلاد العربية أثرت عليه وعلى عيلته.

غذاء العيد

الفيلم اللبناني فاز بجائزة لجنة التحكيم في مسابقة المهر الطويل في مهرجان دبي السينمائي، وبيحكي عن عيلة بيتجمعوا على الغدا في العيد لأول مرة من سنتين، والتوتر اللي بيحصل في التجمع ده.

البرج

فيلم رسوم متحركة فلسطيني، وهو فيلم الرسوم المتحركة الوحيد في الليست وده لأنه فيلم عربي بتدور أحداثه في بيروت عن طفلة لاجئة في مخيم لاجئين، بيديها جدها مفتاح بيته في الخليل، وأثناء رحلتها اللي فيها أمل في الرجوع للوطن، بتجمع حكايات من عائلتها عن وطنهم.

دشرة

هو أول فيلم تونسي رعب، الفيلم اتعرض في مهرجان فينسيا ومهرجان القاهرة السينمائي، الفيلم بيتكلم عن 3 أشخاص بيصوروا سيدة في مستشفى الأمراض العقلية، والموضوع بيوصل إنهم بيشوفوا طفلة صغيرة بتأكل حمامة حية، الفيلم غالبًا مش هيكون حلو، بس تجربة جديدة.

يارا

شارك الفيلم العراقي في المسابقة الدولية بمهرجان لوكارنو الدولي، الفيلم بيتكلم عن بنت عايشة مع جدتها في وادي كل اللي فيه ماتوا، ومفيش حد غيرهم، وقابلت شخص غريب.

حرب كرموز

لأ هو مش الفيلم الأفضل ومضطرين نخليه في الليست دي، هو الأكبر إنتاجيًا وكان  الأول في الإيرادات في عيد الفطر 2018، الفيلم طبعًا إخراج بيتر ميمي وبطولة باشا مصر أمير كرارة، وبيتكلم عن حادثة اغتصاب من ظباط انجليز لبنت مصرية وصلت الموضوع لمحاصرة قسم كرموز.

ممكن تقرأ رأينا في الفيلم من هنا

البدلة

ماينفعش الليست تمر من غير فيلم مصري كوميدي، ولو مابتحبش تامر حسني عدي الليلة وعدي الفيلم ده، احنا شخصيًا ماحبيناش الفيلم، بس الفيلم فضل على عرش الإيرادات فترة طويلة متفوق على "الكويسين" و "الديزل".

تامر حسني وأكرم حسني اتنكروا في لبس ظباط، بس التنكر ده قلب جد واضطروا يعيشوا الكدبة لفترة.

ممكن تقرأ رأينا في الفيلم من هنا

قلب أمه

شيكو وهشام ماجد بعد ما انفصلوا عن أحمد فهمي، مستواهم هما التلاتة قل، خلينا نتفق على كده، بس الفيلم ده اللي بيتنقل فيه قلب أم "هشام ماجد" لشيكو، بيخلي رئيس العصابة حنين من غير سبب منطقي، الفيلم فيه كوميديا وضحك، وحتى لو الضحك مش زي أفلامهم القديمة بس هيفضل بيضحك.