مهما كان لاعب الكورة بيحب الأهلي أو الزمالك أو أي نادي بيلعب فيه، فهو بيحب نفسه أكتر وبيدور طول الوقت على مصلحته وعلى خطوة أعلى يطور بيها الكارير بتاعه، في الكورة الخطوة دي بتكون الاحتراف بره مصر، تنافسية أعلى وأضواء أكتر وفلوس أكتر، بس في لاعيبة تانيين احترفوا بره لأسباب تانية، أهمها أكل العيش. أكل العيش مر وكلنا علينا أقساط ومصاريفنا كتيرة، فبدل ما تعتزل وأنت لسه تقدر تلعب كام سنة زيادة، ممكن تروح تلعب في بلاد تانية حتى لو كانت البلاد دي لسه عارفة قريب إن الكورة مدورة.

• أمير عزمي مجاهد

مدافع الزمالك السابق والمدرب الحالي، لطشت معاه في مصر بما فيه الكفاية، فخرج منها وحلف ما هو راجع حتى لو هيلعب في قبرص وجورجيا. أمير لعب موسم 2013 / 2014 في فريق Zugdidi الجورجي، بس ماكملش الموسم ورجع تاني لمصر من بوابة غزل المحلة، قبل ما يسافر تاني على اليونان. أمير كمان كانت له تجربة في الدوري القبرصي، من بوابة فريق انورثوسيس.

حسب موقع soccerway، أمير ظهر في الدوري الجورجي في 425 دقيقة، بدأ 6 ماتشات اتغير فيهم 4 مرات وأخد إنذارين وماجابش ولا جول. جورجيا عمومًا مستوى الكورة فيها ضعيف وأضعف من مصر كتير، فأنت متخيل كمية البؤس؟

• جمال حمزة

كابتن أمير عزمي لما راح جورجيا، قرر يوجب مع أصحابه، وأصلا المدرب بتاع الفريق الجورجي ده كان صديق شخصي ليه وبيسمع منه، قام أمير رشحله 2 لاعيبة مصريين عشان يضمهم، اللاعبين هما جمال حمزة وأحمد أبو مسلم. الأول لعب مع الفريق لمدة 70 دقيقة بالظبط متقسمة على ماتشين. ماجابش ولا جول ولا عمل أي أسيست ولا خد إنذار حتى ومشي من النادي ويدار ما دخلك شر.

جمال خاض التجربة دي وهو عنده 36 سنة، كان مشطب وهو عارف إنه مشطب بس الراجل الغلبان اللي قاعد في جورجيا ماعرفش إنه مشطب. جمال برضه سبق وخاض تجربة احتراف في ماينز بس مالعبش معاهم ولا ماتش ومشي على طول.

بالنسبة لأبو مسلم، اللاعب التاني اللي رشحه أمير عزمي لمدرب فريق Zugdidi، هتلاقي تصريحات على لسانه بتأكد إنه خلاص هيسافر عشان ينضم للفريق واتفق معاهم على كل حاجة، بس اسمه مابيظهرش في قايمة اللاعيبة اللي انضموا للفريق في الموسم المذكور، جايز تراجع لأي سبب، جايز راح لكن انعدام الاهتمام بالدوري الجورجي خلى مافيش بيانات عن الفترة دي.

• محمد شوقي

شوقي لاعب عظيم، نص ملعب متكامل ومن أحسن الناس اللي لعبت في المركز ده في تاريخ مصر. إدراك شوقي لموهبته خلوه هيموت ويحترف، وفعلا الأهلي وافقله على العرض اللي جاله من "ميدلزبره" الإنجليزي عشان يزامل ميدو. بس الدنيا مامشيتش تمام، فراح الدوري التركي لكونيا سبور بعدها رجع الأهلي بعدها الأهلى استغنى عنه تاني، راح العراق وبعدها شد على ماليزيا.

شوقي لعب مع فريق كيلانتان الماليزي لمدة موسم في 2014. حسب "ويكيبيديا" –مصدر مش موثوق- شوقي ظهر مع فريقه ده في 16 ماتش وأحرز 8 أهداف، بشكل عام هو نفسه بيوصف تجربته في الدوري الماليزي بالناجحة.

• مصطفى عفروتو

ده بقى راح مكان مايخطرش على بال حد، راح أذربيجان. بعد ما عفروتو ساب الأهلي راح لعب في فريق " كارباغ اغدام" في 2013، بعدها رجع على طول على "المقاصة". أنا مش مهتم بالدوافع اللي خلت لاعب كورة يقرر يروح يلعب في أذربيجان، أنا مهتم أكتر أعرف الكورة في البلد دي دايرة ازاي، بعد بحث بسيط لاقينا الدوري ده عبارة عن 8 فرق، الأول بيصعد لدوري أبطال أوروبا والتاني والتالت بيلعبوا في الدوري الأوروبي، وكل أسامي الأندية صعبة كده.

عفروتو كان عامل بداية كويسة والكل متوقع ليه يبقى نجم الأهلي الأول بس نزل أسرع ما طلع وجرب حظه في الدوري العراقي برضه والعماني برضه.

• عبد الحميد شبانة

شبانة لعب في الهند موسم 2013 - 2014، الهند فيها دوريين عشان تبقى فاهم يعني، دوري سوبر ودوري عادي، السوبر ده اللي بيجيبوا فيها اللاعيبة المشاهير بعد ما يشطبوا، في محاولة إنهم يعملوا دعايا للكورة الهندية وبدأ في 2014، زي ما جابو ديلبييرو وتريزيجيه مثلا. الدوري العادي التاني ده، ده اللي لعب فيه ابننا عبد الحميد شبانة.

شبانة بدأ في غزل المحلة وكان ماشي بشكل كويس، راح الأهلي ومالعبش بسبب تخمة اللاعيبة اللي في المركز بتاعه، فراح تليفونات بني سويف، بعدها شد على الهند وتحديدًا فريق "تشرتشل براذرز". "شبانة شارك مع الفريق في 13 ماتش، أحرز هدفين وأخد إنذارين واتطرد مرة واحدة.

• محمد طلعت

قبل كاس العالم للشباب سنة 2009، الأهلى اشترى لاعب مصري بيلعب في الأهلي الإماراتي اسمه محمد طلعت وشكله مدي على روبيرتو باجيو من بعيد كده. اتقال وقتها إن طلعت ده صفقة مهمة وإنه نجم منتخب الشباب اللي هيلعب كاس عالم بعد كام شهر، بس طلعت شأنه شأن عفروتو وشهاب الدين أحمد وبوجي وشكري وكل أفراد جيله اللي مسيرتهم كانت بتخلص قبل ما تبدأ لأسباب غير مفهومة.

فضل طلعت في الأهلي كاحتياطي لحد ما الفريق استغنى عنه وراح الاتحاد، من الاتحاد عمل جولة، راح الكويت وراح الأردن وراح عمان، لأندية "التضامن" و ذات راس" و "الخابورة" بالترتيب، وكلها كمستويات أضعف من الدوري المصري.

• عمرو جمال

في لاعيبة كتير مابتقدرش ترجع لمستواها بعد الإصابة، عمرو جمال أهم مثال على الكلام ده، رغم صغر سنه وبدايته الكويسة، بس بعد ما جاله صليبي مارجعش تاني وخسر مركزه الأساسي في هجوم الأهلي، وعشان يحاول يرجع مستواه، قرر يخوض تجربة احتراف، هيروح فين عمرو؟ راح جنوب افريقيا لفريق "بيدفيست ويتس" في 2017 على سبيل الإعارة، خلصت الإعارة ولسه الأهلي مش محتاجه، هيروح فين المرة دي؟ راح الدوري الفلندي لفريق "هلسنكي".

لعب في جنوب افريقيا 13 ماتش وجاب فيهم جولين ولما راح فلندا شارك في 12 ماتش وجاب جول، بس في المجمل تجربتين في دوريات ضعيفة ومانجحش فيهم ورجع تاني للأهلي.