صعب إنك تقنع حد بيستنى حفلة أم كلثوم كل يوم بالليل على إذاعة الأغاني، إن في حد تاني بيغني أغنية للست بنسخة لا تقل جمالًا عن النسخة الأصلية، واحتمال يكفرك لو تجرأت وقولتله إنك بتحب النسخة التانية أكتر من نسخة أم كلثوم، بس أهو ده اللي حصل. أغاني كتير ممكن أكتر من مطرب يغنوها، ومن بين كل النسخ هتلاقي نفسك بتميل لواحدة عن التانية، حتى لو كانت مش الأصلية.

1- أنا في انتظارك

صعب على حد بيحب أم كلثوم إنه يسمع أغنية بتاعتها بصوت حد تاني، ما بالك بقى لو قولتله إنك ممكن تكون بتفضل النسخة التانية دي على نسخة أم كلثوم؟ أغنية "أنا في انتظارك" ناس كتير غنتها، نسختها الأصلية تسمعها بصوت أم كلثوم من سنة 1943، من كلمات بيرم التونسي وألحان زكريا أحمد، بس ممكن تحبها أكتر بصوت الأوركسترا الإيطالي "دي بيازا فيتوريو".

الأوركسترا ده مكون من عازفين إيطاليين  بقيادة المايسترو "ماريو ترونكو". بيقدموا أنواع موسيقية مختلفة بصوت عربي وتوزيع مختلف، بس ممكن تحب النسخة بتاعتهم أكتر بكتير من النسخة الأصلية.

2- مغرم أنا بيك على طول

في أغاني كده من كتر ما اتغنت من ناس مختلفة، تلاقي نفسك مش عارف مين صاحب الأغنية الأصلية. أغنية "مغرم" واحدة منهم. مغرم ممكن تسمع نسختها الأصلية العظيمة بصوت المطرب اللبناني جاد نخلة، بس ممكن برضه تسمع نسخة ماتقلش في جمالها عن الأصل، بصوت مهند زهير.

 3- مضناك

أغنية كتبها أحمد شوقي ولحنها وغناها عبد الوهاب، مين ممكن يعرف يقدم نسخة تانية تعجب اللي بيسمعها بعد ما يكون سمع عبد الوهاب؟ في 2014 قدم محمد محسن نفس الأغنية مع الأوركسترا الوطنية اللبنانية، وماعتقدش عبد الوهاب نفسه لو سمع النسخة دي كان هيزعل.

 4- جفنه علم الغزل

تاني أغنية لعبد الوهاب، وده من عبقريته كموسيقي إن ألحانه ممكن تتغنى وتتسمع في أي وقت وماتحسش إنها قدمت. الأغنية دي سنة 1933 من ألحان الأستاذ وكلمات بشاره الخوري. في نسخ أحدث بكتير ممكن تسمعها، برشحلك منهم نسخة جاهدة وهبي اللي مش هتخليك تزعل على لحن عبد الوهاب خالص.

 5- للوطن

أنا مابحبش مشروع ليلى –لأسباب موسيقية فقط- بس لما سمعت "عدن واكيم" بتغني لمشروع ليلى على ساوند كلاود، حسيت في لمبة نورت فوق دماغي أو اكتشاف جديد وصلتله. بالنسبالي عدن بتثبت إن الكوفر ممكن يبقى أحسن من الأغنية عادي.

 6- على ورق الفل دلعني

الله يرحمها الست جمالات شيحا، بس الأغنية دي ممكن برضه تسمعها من دينا الوديدي بتوزيع موسيقي عظيم

 7- يا ريت منن

ذكرى كانت مشروع مغنية عظيمة بس مأخدتش حقها بسبب قصر عمرها الفني وطبعا نهايتها المأساوية، بس لسه النت مليان دُرر بصوتها، واحدة منهم هي نسختها من أغنية السيدة فيروز "يا ريت منن". مهما كان حبك لفيروز، هتحب تسمع الأغنية بصوت ذكرى.

 8- امتى الزمان يسمح يا جميل

عبد الوهاب مرة كمان، من ألحانه وصوته وكلمات أمين عزت الهجين. بس المرة دي ممكن تسمعها بصوت الفلسطينية ناي برغوثي.

 9- ومن الشباك لرميلك حالي

دي أغنية من التراث الشامي، حاجة كده ممكن تسمعها بأصوات ناس كتير جداد وقدام، بس ليندا البيطار قدمت منها النسخة المفضلة بالنسبالي.