المحتوى العربي على النت فيه مشكلة، مش قادر أحدد سببها بس هو في مشكلة، مزيف على مبالغ فيه على فقير على غير مفيد، بيمر بمشاكل شبه اللي البلدان العربية بتمر بيها. الرياضة زيها زي كل حاجة في البلاد العربية، محتواها الأونلاين فقير برضه، خصوصًا في الرياضة العالمية، اللي مش هبالغ لو قولت إن متابعيها بيوازوا في عددهم متابعين المحليات. في محاولات لطيفة في مواقع رياضية متخصصة، زي "فيلجول" و "يلا كورة"، بس في كمان شباب بيعملوا شغل مستقل على صفحات فيسبوك، بيتخطى في جودته وسرعته كل المنصات الإعلامية الرياضية. موبايلك في إيدك، اقرا الليستة دي واعملهم لايكات وsee first

1- ShoofPremier

"مجموعة من الشباب العربي تعشق كرة القدم وتهتم بمتابعة أقوى بطولاتها بصورة دورية. وجدنا أن التغطية المتخصصة لبطولة الدوري الأقوى أوروبياً، البرمير ليج، قاصرة باللغة العربية، فحاولنا الاجتهاد في تقديم تغطية شاملة متكاملة لهذه البطولة، وحاولنا الاجتهاد قدر الاستطاعة لتقديم وجبة متكاملة من الأخبار والتحليلات والمحتوى المتخصص، المترجم أحياناً والمعد من قبل فريق العمل غالباً". ده اللي الصفحة كاتباه في الستوري بتاعتهم على فيسبوك، وهما صادقين في كل الكلام ده تمامًا.

لو أنت زي حالاتي بتحب الدوري الإنجليزي، فده أفضل مكان ممكن تتابع منه أخبار الدوري الإنجليزي وتتابع أرقام وإحصائيات وتحليلات، كمان هتلاقي عندهم أي جديد عن الدوري الإنجليزي من كل صحف العالم. صفحة عظيمة فعلا وبتبذل مجهود مش موجودفي معظم المواقع والجرايد. للأسف من كام أسبوع الفيسبوك قفلهم الصفحة بتاعتهم اللي شغالين عليها بقالهم سنين، بس بدأوا من جديد في صفحة تانية بنفس الاسم وبنفس الشغل العالي. الصفحة كمان ليها موقع بنفس الاسم، بس متابعة الصفحة كفاية.

2-  Liverpool Supporters Club Egygt

دي صفحة الرابطة الرسمية لفريق ليفربول الإنجليزي في مصر. ليه الليست دي موجود فيه صفحة بتاعت رابطة مشجعين؟ عشان المصريين اللي بيدوروا على أخبار صلاح بملقاط، يبقوا عارفين الأخبار الصح يلاقوها فين. من ساعة صلاح ما عمل ع الدوري الإنجليزي دخول رايق، المواقع والجرايد المصرية بقت بتنقل أي حرف بيتكتب عن محمد صلاح، تلاقي الجرايد المصرية كاتبة عنوان: "صلاح على أعتاب ريال مدريد"، وبعيدًا عن كلمة "أعتاب" دي، تدخل في الخبر تلاقي المصدر بتاعه جريدة البتنجان المخلل الموزمبيقية، ناهيك عن التجويد اللي زي صلاح قال لكلوب مش هكمل في ليفربول غير لو اشتريتوا عبدلله السعيد، وبأمر من صلاح رمضان صبحي في ليفربول، وحاجة هبد.

الصفحة دي رسمية، بتابع كل كبيرة وصغيرة عن النادي، وبتتواصل بشكل مباشر مع النادي والصحفيين الموثوقين اللي بيغطوا أخباره، لو عاوز تعرف أي حاجة عن محمد صلاح ده المكان المناسب، لغاية ما جرايدنا ومواقعنا يتعلموا إن في حاجة اسمها مصادر موثوقة ومصادر تعبانة، وإنك حتى لو نقلت من مصادر تعبانة، ممكن تكتب جنب اسم المصدر إنه متوسط المصداقية أو ضعيف المصداقية، تمام يا حبيبي؟

3- Koora Plus

مجموعة دكاترة بيحبوا الكورة فعملوا صفحة رياضية وبيقسموا وقت الشغل فيها بينهم وبين بعض، زي ما بيقسموا شيفتات المستشفى. أنا كنت من المحظوظين اللي عملوا لايك لكورة بلس من أول بدأت، حاليا وصلوا ل136 ألف لايك ويستاهلوا أكتر منهم بكتير. كورة بلس صفحة للرياضة العالمية تحديدًا وبيتميزوا بالحياد والموضوعية وكمان التغطيات والتحليلات والمتابعات لكل الأحداث الرياضية المهمة. هما في مستوى واحد مع شوف بريمير، بس هما بيغطوا كل الدوريات، ما عدا الكورة المحلية اللي مالهمش فيها.

4- Epl Articles

هما مقالات زي ما حضرتك قريت كده، ومعظم محتواهم عن الدوري الإنجليزي برضه، بس في الحقيقة ده أفضل مكان تقرا فيه تحليلات. الحاجات الخفية اللي مش هتاخد بالك منها وأنت بتتفرج، ليه في الشوط الأول "مانشيستر سيتي" كان ماسك كورة و"ليفربول" في نص ملعبه؟ وإيه التغيير اللي جد في الشوط التاني خلى فريق "كلوب" يدخل في الماتش من جديد؟ إيه التغييرات اللي عملها المدرب وكانت غلط ولا صح ولما عملها كان بيفكر في إيه؟ قراءة متعمقة في كل تفاصيل الماتش، هتلاقيها في المكان العظيم ده وبأسلوب سلس وبسيط يحمسك ويفهمك. وبرضه كورة عالمية بس.

5-  EParena.com

لمحبي الرياضة المحلية، اجمع هنا. بالنسبالي الصفحة متوسطة المحتوى، عادية، بس بتغطي كل حاجة ومش بتميل لقصف الجبهات والشتيمة وقلة القيمة والصغائر بتاعت الصفحات العربية دي. مافيش محتوى خاص بيهم أو بيميزهم، بس لو عاوز تعرف أخبار أو نتايج ماتشات ومتابعة أول بأول لكل ماتش، سواء كورة محلية أو عالمية، تابعهم ومش هيضايقوك حتى لو مش هيبسطوك. ليهم ويب سايت بنفس الاسم كمان، وعندهم أكتر من 71 ألف متابع على الصفحة.

6- لؤي فوزي

من المفترض إن دي تكون ليست بأسامي صفحات فإيه اللي دخل الراجل ده وسطينا؟ لؤي كان راجل مهندس بس حبه وشغفه بالكورة وكمان موهبته، خلوه يشفت الكارير ويشتغل في صناعة المحتوى الرياضي، وتحديدًا المحتوى المكتوب، اللي بيكون عبارة عن مقالات على مواقع وتحليلات وحكاوي رياضية عظيمة. كان عنده صفحة باسمه بيقدم فيها المحتوى ده، وبيعمل شير للشغل بتاعه على المواقع، بس لظروف انشغاله قرر إنه يقفل الصفحة دي أو يوقف نشاطه فيها، بس ما زال بيكتب على صفحته الشخصية بشكل حر، وبيعمل لايف فيسبوك قبل وبعد الماتشات المهمة يحلل فيه ويتكلم مع أصحابه واللي بيتابعوه.

اعمله فولو بس ماتبعتلوش طلب صداقة، ماتبعتش طلب صداقة لحد أنت ماتعرفوش عمومًا، بتحب شغله وعاوز تستمتع بيه هو مش ممانع وفاتحلك الفولو يا سيدي بس أنت اضغط. كمان تاخد بالك إن دي صفحة شخصية، طبيعي الراجل بياخد فيها راحته وبيهزر ويضحك مع أصحابه، فخليك ضيف خفيف واستمتع.

7-Uefa Sarcasm Society

الساركازم والكوميكس حاجة مهمة في الكورة، وممكن تبقى بتضحك وفي نفس الوقت ذكية. ده اللي هتلاقيه في الصفحة دي. هما بتوع أوروبي زي ما بيقولوا ومش تبع نادي معين. بدايتهم كانت في أغسطس 2013، وبعد أكتر من 4 سنين كوميكس، وصل عدد متابعينهم لأكتر من 600 ألف شخص عن جدارة الحقيقة.

أهم حاجة في كل الصفحات والأشخاص دول، إنهم بيتكلموا في الكورة، مش بس قصف جبهات وتريقة وأي كلام، الكوميكس والتريقة والتحفيل جزء من الكورة وجزء مهم وممتع، بس هما مش الكورة، ولازم عشان تعرف تحفل صح تبقى فاهم صح. ابعد بقى عن كل صفحات الأهلي والزمالك بلا استثناء.