يا تلعب في الأهلي والزمالك يا تفضل في ظلهم، لاعب الناس تسمع منك بس ممكن ماتعرفش شكلك، تقضي 20 سنة بتلعب كورة بس تخرج منها زي ما دخلت. قليلين اللي عرفوا يكسروا القاعدة دي، أو اللي عرفوا يبقوا نجوم من غير ما يلعبوا أهلي وزمالك، أغلبهم بسبب المنتخب، زي عبد الستار صبري وعمارة ورضوان وحسني عبد ربه، وزمان شوية كان محمد عمر وشوقي غريب وعماد سليمان، أو بسبب الاحتراف زي محمد صلاح طبعًا. بس لو أنت مش من دول ولا من دول، فأنت أكيد واحد من نجوم الظل اللي ممكن ماحدش يفتكر شكلك بس الكل فاكر اسمك. دول 7 من نجوم كورة الصف التاني في مصر، اللي عملوا كارير "هادي" واسمهم حاضر دايمًا وسط مشجعين أنديتهم.

1- إكرامي عبد العزيز

شوف يا بني، أول ما توعى على الدنيا لو أنت أهلاوي، لازم بيعلموك حاجة: أرخم ملعبين في مصر هما الإسماعيلية والمحلة. الإسماعيلية هتلاعب فيه فرقة رخمة وكلها عيال حريفة وعندها غل كروي منك ومشاكل مع سكان القاهرة كلهم غالبًا، والمحلة فرقة رخمة برضه وملعبهم شبه غيط البطاطس وأنت ابن ناس ومالكش في لعب الغيطان، بس هما عارفين ملعبهم وحافظينه كويس، وهيطلعوا عين أهلك.

إكرامي عبد العزيز هو واحد من ملوك ملعب المحلة في فترة التسعينات والألفينات. لعب مع الغزل من 93 ل2005 بعدين أخد جولة كده قبل ما ينهي مشواره بالاعتزال. إكرامي كان نجم الفريق الأول خصوصًا بعد ما عبد اللطيف الدوماني راح يجرب حظه في الزمالك. إكرامي انضم للمنتخب على فترات ولعب 3 ماتشات دولية لكن مالوش أي هدف دولي، وفضل في مكانه كنجم أول لفريق بيتدحرج بين منطقة الوسط والهبوط، بس في فترة من الفترات كان هو كل أمل جماهير المحلة.

2- محمد عبد السلام

من المآسي إن لاعيبة زي دي مافيش عنها معلومات متاحة كتير للأجيال الجديدة، فمش هتلاقي ناس كتير عارفة الكروم بتاع التسعينات، اللي كان سبب من أسباب ضياع الدوري من فريق الأحلام بتاع الزمالك، غير اللي اتفرجوا على الفترة دي بنفسهم. فرقة الكروم للي اتفرجوا عليها، كانت مشهورة بحاجتين: صلاح الناهي ومحمد عبد السلام. صلاح الناهي قعد يدرب الفريق حاجة كده بتاع 22 سنة، ممكن تقول عنه إنه "أرسين فينجر" بتاع الدوري المصري.

أما بطلنا محمد عبد السلام، فهو اللاعب المخلص للفريق اللي قضى كل مسيرته معاهم، وفضل معاهم في الدوري الممتاز وفي الدرجة التانية. كان الكروم يطلع وينزل وتلاقي كل حاجة اتغيرت فيه ما عدا محمد عبد السلام، وده اللي خلاه معروف لكل جمهور الكورة في إسكندرية خصوصًا ومصر عمومًا، لكن عمره ما كان هدف لا للأهلي ولا الزمالك ولا هتشوفه في تشكيلة للمنتخب، هو كان نجم في مكانه وحتته.

لو دورت على اسمه هتطلعلك أخبار نادرة أوي، زي إنه شارك في فوز الكروم على الزمالك سنة 1996 بنتيجة 4-2 أو إنه صنع جول التعادل ضد الزمالك برضه في ماتش بينهم سنة 2006، أو إن صلاح الناهي بيعتمد على خبرة محمد عبد السلام في مواجهته مع الأهلي، وطبعًا تقريبًا مش هتلاقي فيديوهات.

3- أكرم عبد المجيد

ممكن يكون أشهر بني آدم في القايمة دي عشان جرب حظه ولعب للزمالك موسمين في نهاية التسعينات، بس مجده كله كان مع بلدية المحلة. في أسطورة بتقول إن تيشرت الأهلي والزمالك "تقيل" على لاعيبة كتير، عشان كده نجوم كتير من أندية الوسط والمؤخرة يبقوا متألقين ومسمعين، بس يروحوا الأهلي والزمالك مايجيبوش ربع مستواهم، ناس زي تشيرنو وحسام باولو وعاشور الأدهم، وطبعًا أكرم عبد المجيد.

ساعة لما أكرم مشي من الزمالك في 99-2000، أخدله جوله كده موسمين مع القناة والمعادن، قبل ما يرجع للبلدية موسم 2001 ولحد موسم 2010. قضى معاهم فترات الصعود والهبوط والحب والضياع، والمرمطة والشقلطة، وكان طول الفترة دي هو النجم الأول، والخطر الأكبر على مرمى غزل المحلة في ديربي مدينة العمال.

4- مهند البوشي

البلد دي فيها كام واحد على جنب كده بيشجعوا الترسانة، ورثوا حب الشواكيش من أبهاتهم وجدودهم اللي حضروا الجيل الذهبي للفريق، اللي كان فيه الشاذلي ومصطفى رياض وشوية ناس عتاولة. الترسانة مرتبطة معايا ب2 لاعيبة، كانوا بيشكلوا ثنائي ذهبي: أبو تريكة والبوشي. الأول شق طريقه وراح الأهلي وحط نفسه في تاريخ الكورة المصرية، والتاني كان اللي خلاني اكتشف إن سوريا فيها كورة أساسًا. والبوشي هو الوحيد في القايمة دي اللي ناديه كان في القاهرة، بس تقدر تقول عنه إنه من أندية الظل برضه

البوشي لاعب سوري وكان نجم فريق الاتحاد السوري وهداف الدوري، لعب موسمين في الترسانة وعمل ثنائي قوي مع تريكة، ووصل إنه يكون تاني هدافي الدوري. البوشي في الأساس كان معروض عليه اللعب في الأهلي، بس وقتها هو فضل يروح فريق الرياض السعودي، وبعد ما راح جاله عرض الترسانة، اللي رحب بيه بسبب حبه لنجم الشواكيش التاريخي حسن الشاذلي.

5- أحمد ساري

هداف الدوري موسم 94 – 95 ب10 أهداف، والنجم الأول للاتحاد في فترة التسعينات. ساري كان لاعيب كورة حريف وأول ما تعمل سيرش على اسمه، هيظهرلك الجول اللي جابه في الزمالك، لما أخد الكورة بكعبه وسط الزحمة وشاط في حراسة من لاعيبة الزمالك اللي جوه المنطقة. ساري كان له مشاركات مهمة مع منتخب مصر، مش كأساسي يعني بس كان بيكون متواجد في القايمة في فترة التسعينات.

ساري ماخرجش من إسكندرية، ولما طلع من الاتحاد راح الأوليمبي، قبل ما يعتزل بشكل نهائي سنة 2002. ساري ماتقدرش تقول إنه من أهم اللاعيبة في مصر مثلًا، بس طبعًا كان أحسن لاعب في إسكندرية وخليفة أحمد الكاس في المدينة وكل جماهير سيد البلد تفتكره وتحبه، مع الفارق إن "كاسو" أعظم بكتير وكان لاعب مهم في منتخب مصر في أواخر التمانينات ولحد النص التاني من التسعينات.

6- إبراهيم المصري

مارادونا بورسعيد زي ما جمهور المصري بيحب يقول عليه. بالنسبالهم ماكانش مجرد لاعب كورة، كان مشجع متعصب للنادي قبل ما يكون لاعب فيه. طلعته كانت قوية جدًا مع منتخب الشباب، لما كسب أفضل لاعب في بطولة أفريقيا للشباب سنة 91، وشارك كمان مع المنتخب في أوليمبياد برشلونة 92 ودورة الألعاب الأفريقية وكاس العالم للشباب. كمان كان مع المنتخب في بطولة أمم أفريقيا للكبار سنة 1996 في جنوب أفريقيا.

المصري من القليلين اللي حققوا بطولات مع فرقته، لما أخد كاس مصر في 1998، وفي أواخر أيامه لما اتفرجت عليه، كان بالنسبالهم زي وليد صلاح الدين كده في الأهلي، بينزلوه آخر الماتش يعمل كام كورة حلويين ويصحي هجوم الفرقة والجماهير تدب فيها الروح، احتفالا بالحريف بتاعهم اللي رفض إغراءات الأهلي والزمالك عشان يكمل في ناديه اللي بيحبه.

7- حسام باولو

ختامها مسك مع هداف الدوري المصري سنتين ورا بعض واللي بطل كورة لما قرر يعمل أبجريد لمسيرته ويروح الزمالك! حسام سلامة الشهير بباولو، له قصة كفاح مشهورة، فضل يطارد حلمه عشان يلعب في الدوري الممتاز، يروح اختبارات أندية ويترفض، ويسيب الكورة خلاص ويروح يلعب طايرة، بعدين حبه للكورة يجيبه تاني، فيروح يلعب في فرق درجة تالتة وتانية بملاليم، لحد يقع في سكة علاء عبد العال مدرب الداخلية.

علاء عبد العال قرر يمضي باولو اللي كان بيلعب وقتها في نادي الشمس، و"باولو" ماقصرش وأخد هداف الدوري مع فريقه الجديد ب20 جول. بعدها راح سموحة وهو خلاص معدي 30 سنة، فيثبت مرة تانية إن الموضوع ماكانش صدفة ويكسب جايزة هداف الدوري لتاني سنة على التوالي. الغريب في الفترة دي إنه ماكانش بيلعب للمنتخب خالص!

تألق باولو كان في أندية القسم التاني والتالت والأقاليم، لما قرر يستجيب لعرض الزمالك في 2017، ماقدمش معاهم ربع مستواه اللي قبل كده، وخلصت التجربة بإعارة للاتحاد. باولو حاليًا 34 سنة، ونوعًا ما مالعبش في التوب فورم غير سنتين، بس اسمه اتسجل كأول لاعب يفوز بهداف الدوري سنتين ورا بعض مع فريقين مختلفين، والناس هتفتكره على إنه اللاعب المجتهد اللي كان لازم يفضل في الضل وينجح معاه ومايروحش الزمالك.