• اكتب معانا
  • ماتنسناش
  • تابعنا
الموضوع اللي جاي
فريق مصري فاز بالمركز الأول في مسابقة عالمية لتصميم نماذج الطيارات
الموضوع اللي فات
دبي أغلى رابع مدينة في العالم من حيث الإيجارات

7 مخرجين تتفرج على حلقاتهم المنفصلة من غير ما تتابع المسلسل كله

أنا باخاف من الكوميتمنت

الخوف من الكوميتمنت مش بس في العلاقات العاطفية والخطط طويلة المدى، ممكن تخاف تتعلق بمسلسل حلو ماعندكش وقت تشوفه كامل أو تتعلق بمسلسل وحش وتضطر تكمله لمجرد إنك "اتدبست". لو انت وصحابك عايزين تتفرجوا على حاجة في ساعة زهق من غير ما تلبسوا في مسلسل ربنا وحده يعلم عدد حلقاته، هتعملوا ايه؟

تتفرج على مسلسل من 60 ولا 30 ولا 10 حلقات؟ في مصر اتعودنا المسلسلات تبقى 30 حلقة، قال قائل، ماعرفهوش ومش متأكدة من صحة كلامه، إن الرقم مرتبط بأيام شهر رمضان بما إنه موسم المسلسلات، مؤخرًا بقى المسلسل يوصل للـ 60 حلقة، زي "أبو العروسة" و"سابع جار"، وقال قائل برضه إنه دي حيلة دفاعية بتنافس بيها الدراما المصرية الدراما التركية، أو بتقلِّدها. في أوروبا والدول المتقدمة بقى المسلسل عادةً بيبقى متقسم على مواسم، كل موسم منهم 10 حلقات بس، وفي الأغلب بيشترك في إخراجه أكتر من مخرج.

الإجابة ولا واحدة من دول سعادتك، في لحظة روقان وبنظرة سابقة لعصره، بدأت في الخمسينات في أمريكا موضة الـ Anthology Drama، ودي ببساطة يعني مسلسلات حلقاتها مالهاش علاقة لبعضها، الممثلين مختلفين والحبكة مختلفة والحدوتة بتبدأ وتخلص في الحلقة من غير ما تحتاج تشوف حلقة سابقة تفهم منها الأحداث ولا تستنى حلقة جاية عشان تعرف هيحصل إيه. حاجة كده زي مسلسل "يوميات زوج معاصر" اللي اتعمل سنة 2003 وحقق نجاح كبير. حلقات المسلسل كان بيجمعها شيء واحد وهو الفكرة العامة، واحد ومراته بيقعوا في مشاكل. لكن في مسلسل "نصيبي وقسمتك" اللي انتج سنة 2016 واتعمل منه جزئين ماكانش فيه وحدة موضوع وفكرة تجمع الحلقات. والمسلسلين الكوميدين "هربانة منها" و"ريَّح المدام" اللي تم إذاعتهم في رمضان 2017.

في أمريكا وانجلترا فيه مسلسلات كتير ماشية بنفس النظام، ومعظمهم بيبقوا خيال علمي وأحداثهم بتحصل في المستقبل، يمكن أشهرهم يبقى Black Mirror، اتقل وهانقولك على مسلسلات زييه كتير.

بالنسبة للمنتجين المسلسلات المنفصلة المتصلة زي الدنيا، فيها حاجة كويسة وفيها خازوق، الكويس فيها إن مافيش ارتباط كبير بممثل معين وفي حرية أكبر لتغيير الكاست، الخازوق بيبقى في التسويق للمسلسل. انت ممكن مايبقاش عندك فكرة واحدة تبيع بيها المسلسل فـ بتحتاج تسوَّق كل حلقة لوحدها، وده جهد أكبر ومصاريف أكتر.

بالنسبة بقى للمشاهد، لو عايز تتفرَّج على حلقات معينة من المسلسلات دي من غير ما تمشي بالترتيب، هنا هانقولك على مخرجين بعينهم تتفرج على حلقاتهم وتحمد ربنا وتدعي للي اخترع الـ Anthology Drama

1) Adam Bernstein

بعد ما فاز بالـ Primetime  في  Emmy Awardsسنة 2006 عن مسلسل 30 Rock، اشتغل في مسلسل Fargo، اللي اتعمل منه أربع مواسم على مدار خمس سنين، وأخرج حلقتين في المسلسل واخدين تقييمات عالية، الحلقتين هما: The Rooster Prince وThe Crocodile's Dilemma.

كمان لو بتحتب مسلسل Breaking Bad فـ هتلاقي Adam أخرج ما لا يقل عن حلقتين في كل موسم.

2) John Crowley

لو بتحت فيلم Brooklyn، فـ John هو مخرجه.

ولو بتحب المسلسلات اللي بتدور حوالين قضية ولغز وعايز تعرف بيحلّوها ازاي هل أمريكا مافيهاش ضرب على القفا وتعذيب بجد ولا بيشتغلونا، اتفرَّج على حلقتين John في مسلسل True Detective: 

Omega Station و Other Lives.

3) Jeffrey Reiner

هو في الأساس منتج، بس جرَّب حظه في الحلقات المنفصلة وبدأ بمسلسل Fargo في 2015 وعمل حلقتين، هما: Rhinoceros و The Gift of the Magi.

بعد مشاركته الأولى حب الموضوع أوي وشارك سنة 2017 في مسلسل Philip K. Dick's Electric Dreams بحلقة Real Life.

4) Steven Spielberg

فخامة الاسم تكفي، كتابة تلاقي، إنتاج تلاقي، إخراج أفلام تلاقي، إخراج حلقات منفصلة كمان تلاقي.

سنة 1985 كان في مسلسل واكل الجو في أمريكا، اسمه Amazing Stories، بيحكي عن أبطال خارقين وليلة كبيرة أوي سعادتك، استمر لسنتنين واترشح لـ 12 جايزة Emmy.

Steven اشتغل فيه كمنتج منفذ، وأخرج حلقتين هما: The Mission و Ghost Train.

5) Martin Scorsese

في عز نجاح Amazing Stories حب Martin يكون ليه حتة من التورتة، أخرج حلقة Mirror, Mirror .

شوف جزء منها من هنا.

6) Danial Attias

لو بتحب House أو سمعت إنه حلو، ركَّز في حلقات: Transplant، Selfish، Humpty Dumpty،Locked In

ولو عجبوك شوف Danial Attias أخرج ايه كمان في المسلسل، لو عجبوك برضه اتفرَّج له على حلقته اللي أخرجها في الموسم التاني من True Detective: Black Maps and Motel Rooms.

7) Danny DeVito

مخرجين كتير بيحبوا يظهروا قدام الكاميرا من منطلق طبَّاخ السم بيدوقه، لكن Danny الموضوع عنده معكوس، هو في الأساس ممثل ظهر في One Flew Over the Cuckoo's Nest و Mars Attacksوحلقة من مسلسل Friends اسمها The One Where the Stripper Cries، تحديدًا هو كان الـ Stripper.

Danny قال يجرَّب حظه وأخرج حلقة من Amazing stories اسمها The Wedding Ring .

لو عايز تروق نفسك في ساعة من غير إلتزامات مش هتقدر تعملها، فيه مسلسلات كتير هتفي بالغرض زي:

- Black Mirror

- The Guest Book

- Electric Dreams

 

-  Room 104

Home
خروجات النهاردة
Home
Home