• اكتب معانا
  • ماتنسناش
  • تابعنا
الموضوع اللي جاي
شاعر اتقبض عليه في كمين كتب أغنية غناها عدوية.. 6 حكايات أغاني غريبة
الموضوع اللي فات
20 صورة لبنات الوطن العربي قبل ما يبقوا السبب في التحرش

5 أسباب تفهمك ليه "الدحيح" بيتقال عليه ملحد؟

بيتهاجم من مسلمين ومسيحيين

"الدحيح" مصطلح مصري دارج بنستخدمه لوصف الطلبة اللي بيفضّلوا القعاد في الصف الأول -غالبًا بيكونوا لابسين نضارة كعب كوباية- وليه وقعه الساخر بين معظم المصريين، عشان كده استخدمه الشاب "أحمد الغندور" كاسم لبرنامجه اللي بيحاول فيه تبسيط مبادئ وقوانين العلوم وتقديمها بشكل مُبسط يناسب غير المهتمين بيها.

"الغندور"، أو "الدحيح" زي ما بقى معروف، اتخرَّج من قسم الأحياء في كلية العلوم بالجامعة الأمريكية. واتجه في أغسطس 2014 لعمل فيديوهات بتقدم نظريات علمية بطريقة ساخرة على السوشيال ميديا، بعد ما قدِّم عرض لنظرية علمية في 3 دقايق ولقى إعجاب وتشجيع من الحاضرين. بعدها بدأ رحلته في عالم السوشيال ميديا والمتابعين بكاميرا من أخوه وعباية من أمه متعلَّقة وراه في الخلفية، ووصل بعد 3 سنين لشعبية بالآلاف وحلقات منتظمة بلوكيشن مُحدد ومخرجين متعددين.

من يوم ما بدأ ولحد دلوقتي، اتغيرت حاجات كتير في حياة الغندور وبرنامجه، بس الشيء شبه الثابت، هو اتهامه بالإلحاد والعمل على الإساءة للإسلام ودعم الصهيونية. سواء كان الاتهام مُبطَّن في شكل نصيحة ولا في نص هجومي صريح. الاتهامات اللي طالته كان ليها أسباب، عندك مثلًا:

*الإنسان ليه حق التصرف في جسمه، سواء بالتبرُّع، البيع أو القتل

حلقة "أبيع نفسي" كان عنوانها في حد ذاته صادم ومُخالف بشكل صريح لآراء كتير من المسلمين اللي بيشوفوا إن جسم الإنسان مش ملكه، وبيستخدموا الرأي ده لتأصيل حرمانية الانتحار. بالنسبالهم، الإنسان لا يملك في نفسه شيء، لا جسد ولا روح. وعليه، قتله لروحه أو بيعه لجزء من جسمه حرام.

ده بالإضافة لمناقشته بيع الحيوانات المنوية والبويضات، وهي تجارة غير مشروعة ولا مقبولة مجتمعيًا حتى الآن في مصر، وقانون مهنة الطب يمنعها بوضوح، كذلك الإسلام خوفًا من اختلاط الأنساب.

لحد فترة قريبة كان بعض الشيوخ، منهم الشيخ متولي الشعراوي في درس ليه، بيحرَّموا نقل الأعضاء لإنقاذ حيوات الناس. ما بالك باللي بيتكلم في الأعضاء والتربُّح منها؟

*الهولوكوست مجزرة أعداد ضحايها كارثية وصلت لـ 6 مليون

في حلقة "السمع والطاعة" استخدم "الغندور" الحزب الألماني النازي ورئيسه "هتلر" كمثال لشرح نظريات السمع والطاعة اللي ناقشها، وأشار مرارًا وتكرارًا للاضطهاد اللي اتعرض له اليهود في الفترة دي، بدايةً من النفسي، مرورًا على الطرد من المدارس وحرق الممتلكات، وصولًا لإيداعهم في الجيتو وحرقهم في أفران الغاز. وذكر إن أعداد اليهود اللي اتقتلوا في المجازر دي وصل لحوالي 6 مليون، الرقم اللي استفز مُعلِّقين كتير وشككوا في صحته وصحة المصادر اليهودية -على حد ذكرهم- اللي استند إليها الدحيح.

محور نقاش الدحيح والنظرية اللي طرحها ماكانتش أرقام الضحايا أصلًا، فكرته كانت في سؤال واحد، اللي بينفذ أوامر القتل في مجازر بشرية بيبقى إيه الدافع عنده؟ وهل "قالوا لي أعمل كده" ينفع يبقى مبرر؟ وليه أغلبية البشر -حسب نتايج الدراسات- بيميلوا لتنفيذ أوامر القتل والتعذيب حتى لو رفضهم مش هيعود عليهم بأي ضرر؟

الدراسات اللي أشار ليها الدحيح ممكن تبقى نواة بحث مُكثف يُستخدم في صالح شعوب كتير بتعاني النهاردة، لكن بعض المُعلقين تغافلوا عن أهمية النظرية ومسكوا في أرقام ضحايا اليهود.

*بداية الكون كانت الانفجار الأعظم

من النقط اللي اتسببت في شن هجوم عليه، هي استناده على نظرية الانفجار الأعظم لمَّا قال نصًا في حلقة أبيع نفسي: "هاحكي لك قصة حصلت من زمان خالص. من 14 مليار سنة، حصل ما يسمى في علم الفيزياء بالانفجار الأعظم"، وقال إنه على حد علمنا، دي بداية الكون. ضاربًا عرض الحائط بالمفاهيم الدينية المختلفة عن بداية الخليقة.

*العلم في تطور والدراسات بتقول إن الموت له نهاية

في حلقة "نهاية الموت" السؤال اللي كان بيناقشه معانا الدحيح في النص الأول منها هو: في ظل التطور الكبير اللي حققناه ولسه هنحققه في مجالات التصدّي والوقاية من الأمراض ووقف العنف بأشكاله المهددة لحياة البشر، ليه مانقدرش نمنع الموت ونحُط له نهاية؟ خلال الحلقة ذكر الغندور إن التوقعات بتقول إن بقدوم سنة 2050 عدد الناس اللي بتوصل لـ 80 سنة هيزيد 3 مرَّات، طب ازاي وفي حديث صحيح رواه أبو هريرة بيقول:"أعمار أمتي ما بين الستين إلى السبعين وأقلهم من يجوز ذلك"؟

رافعي شعار حماية الأديان في مواجهة الدحيح، في الأغلب قفلوا الفيديو قبل الدقيقة 4:05، اللي بعدها شرح الدحيح دراسة بتثبت إن من حوالي قرن بدأ عمر البشرية في الازدياد، لكن في آخر 30 سنة تحديدًا، عدد الناس اللي بيتخطى عمرهم المية بقى مابيزدش، ده بقى يقل كمان! الدراسة دي حسب كلام الدحيح خلِّت العلماء يضربوا كف بكف.

المعارضين للدحيح استنادًا على النقطة دي استشهدوا بالآية القرآنية: "كل نفس ذائقة للموت"، نهاية موت إيه بقى اللي بيتكلِّم فيها؟!

*مافيش حقيقة علمية بتقول إن الأسبوع 7 أيام

بالنسبة للدحيح، السنة والشهر واليوم ممكن نعرف سبب نشأتهم في الشكل المتعارف عليه حاليًا، لكن الأسبوع لأ، وفي أثناء بحثه عن سبب لجعل الأسبوع 7 أيام، لقى أكتر سبب منطقي هو السبع أجرام السماوية لبابليون، مش الاعتقاد السائد عند المسلمين والمسيحيين عن نشأة الكون في 6 أيام ويوم زيادة للراحة.

في أول كام ثانية من فيديو "سبوع الأسبوع" المشاهد غالبًا هيتفاجيء بإن دول الاتحاد السوفيتي كانوا في فترة ماعندهمش يوم جمعة، طب المسلمين اللي هناك كانوا بيصلوا الجمعة أمتى؟! ومن وسط حكي كتير عن الثورة الفرنسية، عرفنا من "الغندور" إن فرنسا سنة 1793 غيروا التقويم وعدد ساعات اليوم كخطوة في طريق إلغاء الهيمنة الكنسية هناك. يعني عملوا تقويم جديد اتعرف باسم French Revolutionary Calendar ، واستمر لتلات سنين، وبقى الأسبوع فيه بـ 10 أيام متسمِّين بالأرقام.

في كتير من الأوقات بينهي "الغندور" حلقاته وهو بيأكد إن هدفه الوحيد توصيل معلومات علمية بحتة بأسلوب "روش" ولطيف يجذب الشباب، لا أكتر ولا أقل. لكن بالرغم من كده ناس كتير بتستنى حلقاته عشان تتصيد له الأخطاء ويقارنوا النظريات اللي بيتم مناقشتها بمعتقداتهم الدينية.

Home
خروجات النهاردة
Home
Home