يوم التلات كان هو يوم فيلم الرعب على قناة MBC2 اللي سمحت لجيل التسعينات إنه يتفرج على أفلام أجنبية نضيفة ببلاش. لو القناة في يوم غيرت نشاطها لا قدر الله، وعملت يوم الرعب ده لأفلام مصري، كانت هتلاقي إيه تعرضه؟ الرعب والخيال العلمي عمومًا مش من النوعيات اللي السينما المصرية أجادت صنعها وإنتاجها، رغم المحاولات الكتير اللي بدأت من الأربعينات ولغاية النهاردة. وسط كم كبير من أفلام الرعب المصرية، كان في حاجات يتقال عنها إنها مش بطالة أو ينفع يتقال عنها إنها أفلام. دول 7 منهم.

ملحوظة: فيلم الرعب مش لازم يخليك بتتنفض وأنت قاعد بتتفرج عليه. ممكن يكون فيلم مابيخوفش، لكن الحبكة بتاعته قايمة على شئ غير عادي أو مجموعة خوارق بتخوف أو علاقة البني آدمين بالشياطين مثلًا وحدوث شكل من أشكال التحالف ما بينهم، غالبًا ينتهي بصراع.

• سفير جهنم

المصريين بيعملوا أفلام رعب من سنة 45 عادي، وحتى لو مش عاجبك، فهو أحسن من أفلام جديدة كتير وسابق عصره ولسه يتشاف لغاية دلوقتي. الفيلم بيتكلم عن أقدم صراع في التاريخ، الصراع الأزلي بين الشيطان والبشر. بيلعب دور الشيطان يوسف وهبي، اللي بيحاول يثبت تفوقه على بني آدم، فبيختار أسرة يغويها ويجذب أفرادها واحد ورا التاني للنار. الفيلم بينتهي بإن الشيطان بيتحرق وإن أفراد الأسرة بيكتشفوا إن كل اللي حصل مش حقيقي وإنهم كانوا بيحلموا كلهم في نفس الوقت. الفيلم من تأليف وإخراج يوسف وهبي برضه.

أسوأ ما في أفلام الرعب المصري هي النهايات، النهاية لازم تكون متوافقة مع رؤية المصريين لإبليس، اللي هو هنقرا عليه آية الكرسي أو هنصلي العصر جماعة فيتحرق. ودايما لازم الفينالة تبينلك إن الإنسان بعد عن ربنا وجرب سكة الشيطان واتحالف مع إبليس ذات نفسه، لكنه ندم وعرف إن الله حق، فيتحول العمل الفني لخطبة أخلاقية.

• موعد مع إبليس

نفس الثيم تقريبًا. الشيطان اللي بيتحالف مع بني آدم ويغويه بمكاسب كتيرة، قبل ما يكتشف البني آدم إن حياته بتتحول لجحيم بسبب الشيطان، فينهي التحالف ويرجع لصراعه الأزلي. فيلم من إنتاج سنة 1955. لعب فيه زكي رستم دور طبيب على قد حاله وبيعاني من مشكلات مادية، فالشيطان (محمود المليجي) بيعمل معاه ديل، على أساسه بيكتسب الطبيب شهرة وفلوس كتير. بس النهاية لازم تكون باكتشاف البني آدم لغلطه وانتصاره على الشيطان.

• المرأة التي غلبت الشيطان

عادل أدهم دمه خفيف جدًا وهو بيلعب دور الشيطان. معظم الأفلام في الليست دي بتلعب على نفس التيمة بتاعت تحالف الشيطان مع بني آدم. الفيلم من إنتاج سنة 1973، وبطولة شمس البارودي ونور الشريف وعادل أدهم ونعمت مختار. التحالف هيتم بين الخدامة شفيقة وبين حفيد إبليس، اللي هيساعدها تبقى جميلة وغنية مقابل إنه يمتلك روحها، بس هي هتسخر جمالها ونفوذها في الانتقام من الأشخاص اللي ظلموها زمان.

• الإنس والجن

أشهر فيلم رعب مصري على الإطلاق وأكتر فيلم بيخوف في القايمة كلها. وكمان من الأفلام اللي لعبت على تيمة مختلفة تمامًا وجسد علاقة حب طرفها جن وإنسانة. الفيلم غني عن التعريف. إنتاج سنة 1985 وإخراج محمد راضي ومن بطولة عادل إمام ويسرا وعزت العلايلي.

• الرقص مع الشيطان

مايعتبرش رعب أوي، هو أقرب للفانتازيا أو الخيال العلمي. تم عرضه سنة 1993، من بطولة نور الشريف وإخراج علاء محجوب. بيحكي الفيلم عن عالم قدر بشكل كيميائي إنه يلاقي مركب بيخليه يسافر عبر الزمن. كان كل مرة بيسافر للماضي ويحاول يكتشف مكان كنز قديم سابهوله جدوده. بعد كده بيروح المستقبل وبيكتشف إنه مات في وقت معين، فبيحاول يغير ده في الماضي.

الموسيقى التصويرية والكلب الأسود اللي بيظهر كل ما نور الشريف يتناول العقار، عملو جو سسبنس لطيف. النهاية طبعًا لازم تكون وعظية وتنزل آيات قرآن في الخلفية، عشان ماينفعش نكمل حاجة فانتازيا للآخر.

• اختفاء جعفر المصري

نور الشريف وحسين فهمي عملوا نفس التيمة بتاعت تحالف الإنسان والشيطان، ومأخوذة عن المسرحية العالمية (مركب بلا صياد). حسين فهمي بيلعب دور الشيطان اللي هينقذ رجل الأعمال نور الشريف من الكوارث اللي كان واقع فيها، مقابل إنه يرتكب جريمة القتل، باعتبارها أعظم جرم ممكن يرتكبه الإنسان، وده اللي الشيطان عاوزه وبيدور عليه. بس من بعد الجريمة بيتحول نور الشريف وبيتقلب اتفاقه مع إبليس لصراع.

الفيلم فيه أبطال تانين زي رغدة ومجدي كامل وجمال إسماعيل وألفت الإمام ومن إخراج عادل الأعصر. اتعرض للجمهور سنة 2002. النهاية لازم تكون بنفس الطريقة، الإنسان انتصر وجات شياطين لابسة أسود في أسود أخدت حسين فهمي اللي قصر رقبتهم وهزمهم.

• الفيل الأزرق

أعلى كواليتي من حيث القصة والصورة وأنجح فيلم في كل الأفلام دي من حيث الجماهيرية والإيرادات. الفيلم متاخد عن رواية لأحمد مراد اللي هو نفسه كتب الفيلم وإخراج مروان حامد. بيلعب كريم عبد العزيز دور طبيب نفسي بيحاول يساعد زميل ليه ارتكب جريمة، نتيجة جن كان مسيطر عليه.

رواية ناجحة وضمن الأعلى مبيعًا، مثلها ناس بأسامي كريم عبد العزيز ونيللي كريم وخالد الصاوي بإنتاج ضخم، فكان طبيعي يكون فيلم يعلق مع الناس. هي بس المعالجة بتاعت الفيلم مماثلة بالظبط للرواية، فحبك للفيلم مرتبط بحبك للرواية، أو ماتقراش الرواية وخلاص.

ممكن نرتب من الأفلام دي مين أحسن واحد لعب دور شيطان. هنلاقي عادل أدهم كان أروش واحد. بعديه يوسف وهبي ومحمود المليجي وعادل إمام، بأداء تمثلي حلو. أوحش واحد طبعًا هو حسين فهمي