في التمانينات ضربوا نار على السادات في العرض العسكري، رشدي أباظة مات وأبويا اتجوز أمي. مارادونا ظهر، بيقولوا كان أحرف من بيليه بس ما علينا. في البيت كانت أمي بتقدس حاجتين: برنامج نادي السينما كل يوم سبت وإذاعة الشباب والرياضة. في الإذاعة كانوا بيذيعوا أغنية بتضحكني، بتقول "ماتحسبوش يا بنات إن الجواز راحة وماتزعلوش يا بنات إن قولنا بصراحة إن الجواز عمره.. عمره ما كان راحة" حلوين، مين دول يا ماما؟ ده فريق المصريين بتاع هاني شنودة.

في أواخر السبعينات كان هاني شنودة ومجموعة من الموسيقيين الشباب، بيلفوا الدول العربية ويلعبوا أغاني غربي، بعدها طور الفكرة وعمل "المصريين" بمزيكا جديدة وبنفس فكرة فرق الأندرجراند اللي دلوقتي بقى جمهورهم كل يوم بيزيد. "المصريين" فتحوا الباب لفرق تانية انتشرت وحققت نجاحات كبيرة في التمانينات، "الأصدقاء" "طيبة" "الفور إم" "الحب والسلام".. إلخ. يمكن بعد ما فرق الأندرجراوند اتشهرت، الناس طلعت دفاترها القديمة ودورت على فرق التمانينات والتسعينات، لو ماكنتش تعرف عنهم حاجة، الموضوع ده دفتر من الدفاتر القديمة اللي هتتفتحلك.

1- المصريين

لو ماسمعتش المصريين قبل كدة، اسمع "لما كان البحر أزرق" و "الشوارع حواديت". ليهم أغاني تانية مشهورة زي "ماشية السنيورة" و "ماتحسبوش يا بنات". الفريق انتهى سنة 88 بعد ما ناس من أعضائه ماتت أو اعتزلت، بس أغانيهم وألبوماتهم لسه موجودة، كمان هما رجعوا يغنوا لكن بيعملوا حفلات قليلة في مسرح الجمهورية وساقية الصاوي، وحتى لو دبلت الوردة فريحتها فيها.

2- الحب والسلام

مرة كانوا مستضيفين حمزة نمرة في برنامج وقت ما كانت الناس بدأت تعرف إن في حد اسمه حمزة نمرة، اتسأل عن الموسيقيين اللي اتأثر بيهم، فقال أحمد منيب وفريق "الحب والسلام" وفعلا في أغنية حلوة لفريق الحب والسلام اسمها "عصفورين" هتلاقي منها نسخة بصوت حمزة نمرة. الحب والسلام فريق سكندري كونه الملحن نبيل البلقي سنة 1978 ورجعوا تاني يشتغلوا سنة 1998 بعد فترة من التوقف. حظ الحب والسلام من الشهرة كان أقل من باقي الفرق اللي ظهرت معاهم في نفس الوقت، رغم إن عندهم أغاني بتتسمع لغاية النهاردة، زي "عصفورين" و "بعد سنين" والتانية ممكن اسمعها كل يوم عادي

3- الفور إم

عزت أبو عوف مزيكاتي شاطر وصاحب مواهب متعددة وسبع صنايع، بس صانعته الأهم إنه روش وخفيف، ولما جمع أخواته البنات وعمل بيهم باند، ماقدموش مزيكا عظيمة بس قدموا حاجة روشة بدم خفيف مش هتضايقك وأنت بتسمعها، وعادوا توزيع حاجات فلكلورية مهمة زي "الليلة الكبيرة" و "التوبة"، وأغاني كانت ممكن أمك تغنيهالك وأنت صغير زي "دبدوبة التخينة". الفريق ماستمرش كتير، وكمل عزت طريقه كشخص بيعرف يعمل سبع تمن حاجات، وكملت معاه مها في مجال التمثيل وحققت شهرة كويسة.

4- الأصدقاء

عمار الشريعي بقى وعلاء عبد الخالق ومنى عبد الغني وحنان. في فترة كانت كل الناس اللي مسافرة لازم تسمع أغنية "الحدود" شالله لو مسافرين الساحل! بس هي الأغنية حلوة الحقيقة، وعمار الشريعي قدم أصوات عاشت من بعد "الأصدقاء" لفترة طويلة، وقدموا أثناء وجودهم في الفريق حاجات تانية مهمة زي "مع الأيام" و"حبيبتي بتعلمني أحب الحياة".

5- طيبة

في 2011 انتشر فيديو مشهور لباند طيبة، مش علشان كان فيديو حلو، لكن علشان الدرامر بتاعهم كان أحمد عز، واحد من رموز نظام مبارك في أواخر عهده وصاحب إمبراطورية حديد عز. بس ده كان ظلم لطيبة ولحسين اللي بالنسبالي في شبه من عزت أبو عوف، كونهم الاتنين أصحاب سبع صنايع، وطبعًا لموسيقي شاطر زي مودي الإمام، ليه تبقى كل معلومات الناس عنك إن كان عندك باند بيلعب فيه شخص هيصادف إن البلد كلها بتكرهه في وقت من الأوقات؟ لو عاوز تعرف عن طيبة، اسمع شكلك ماتغيرش، وودعي المكان.

Photo By: Zein Zaher