المسلسلات مش بس مصري، يمكن المصريين هما الأشطر والأشهر في العرب دراميًا، بس المسلسلات السوري والخليجي مثلًا بتلعب في حتة تاني خالص، يعني لو عايز تشوف مسلسل تاريخي فعلًا لازم تتفرج على السوري، ولو بتحب النجوم اللي بيجوا يمثلوا هنا ويعوجوا لسانهم ويتكلموا مصري، جرب تشوف وهما بيتكلموا لغة عربية أو بلغة بلدهم، هتحبهم أكتر بكتير.

نزار قباني

"فصلت من جلد النساء عباءة وبنيت أهراماً من الزحلمات"

-" زحلمات؟ بقى نزار هيقول زحلمات"

ده مشهد من فيلم التجربة الدنماركية، والحقيقة إن نزار مش كل شعره جنس زي مالناس فاكرة، هو كان اينعم بيحب كل يوم واحدة، بس كان بيبقى عنده مشاعر مختلفة فعلا، وجت في الآخر واحدة خلته ينسى كل اللي فات ويكتب ليها وعنها بس. المسلسل ده كان بداية معرفتي بتيم حسن، ويمكن مايكونش أعظم مسلسل، بس هيعرفك تفاصيل حياة شاعر مهم وتفاصيل فترة معينة في تاريخ سوريا والعرب.

ساق البامبو

المسلسل عن رواية من تأليف الكويتي سعود السنوسي وفاز عنها بجائزة البوكر لسنة 2013، وتم عرض المسلسل في 2016. الرواية بتحكي عن ولد كويتي أمه فلبينية، اتجوزت في السر وخلفته، وهيفضل عايش معاها في الفلبين لحد ما يقرر يسافر الكويت يدور على أهله. المسلسل بطولة سعاد عبد الله ومجموعة من الممثلين، الرواية قماشة عظيمة عشان تعمل منها مسلسل عظيم، خصوصًا مع الاستعانة بممثلين فلبينين.

عائد إلى حيفا

المسلسل مأخوذ عن رواية الكاتب الفلسطيني غسان كنفاني، وده لوحده سبب يخليك تشوفه. بيحكي عن رحلة التشتت والعذاب اللي عاشها الفلسطينين بعد سقوط حيفا سنة 1948، وإخراج المخرج الفلسطيني السوري باسل الخطيب.

ربيع قرطبة

نحفظ قواعد الدراما السوري؟ أحسن ناس بيعملوا مسلسلات تاريخية، عندهم مخرج عظيم اسمه حاتم علي.

وعشان كده ممكن تتفرج على ربيع قرطبة وأنت مغمض. المسلسل اللي بيتكلم عن أزهى عصور الأندلس خلال حكم الناصر والمستنصر، ولو ليك في المزيكا على الساوند العربي غالبًا هتكون سمعت "أيا لك من نظرة" فهتحب المسلسل قبل ما تشوفه.

المسلسل ليه جزئين متصلين منفصلين كمان، هما ملوك الطوائف وصقر قريش، بس لو شفت واحد بس هتفهم كل حاجة.

قلم حمرة

لو بتحب مسلسل "الخواجة عبد القادر" فغالبًا انت بتحب سلافة معمار، ولو متابع جيد للدراما هتحب حاتم علي، والمسلسل ده بيجمع الاتنين. المسلسل بيتكلم عن السوريين بعد 2011 وتفاصيل حياتهم، وناقش مواضيع جريئة زي المثلية الجنسية مثلًا.

آخر أيام الحب

التتر الحلو غالبًا بيبقى مسلسله حلو، معرفش ده حقيقي ولا لآ، بس المسلسل ده بيملك تتر عظيم. بيتكلم عن مصري وسورية اتجوزوا وقت ما كانت مصر وسوريا متحدين، وبعد الانفصال اتفرقوا وماكنوش يعرفوا حاجة عن بعض. أحداث المسلسل مملة شوية، بس فيه شجن جميل.

بلقيس ملكة سبأ

مسلسل أردني بتدور أحداثه في اليمن عن قصة حياة "بلقيس". المسلسل بطولة صبا مبارك، وكسب جائزة الإبداع الذهبية وشهادة تقدير لأفضل ديكور في مهرجان القاهرة العربي للإعلام، وجائزة دبي للدراما العربية في مهرجان دبي.

خالتي قماشة

مسلسل كوميدي كويتي، ورغم إن المصريين أخف دم، بس المسلسلات الخليجية الكوميدية يجي منها برضه، المسلسل بطولة حياة الفهد "قماشة" اللي بتحط كاميرات تجسس في غرف ولادها المتجوزين عشان تعرف كل حاجة عنهم.

الندم

مسلسل سوري اتعرض سنة 2016 وبيتكلم عن كاتب تليفزيوني بتبدأ حكايته ليلة سقوط بغداد لحد ما يوصل للأوقات الحالية.