أفكار مهمة ولغة سهلة: 8 كتب بالعامية المصرية
لو بتحب القراءة بس بتزهق من المعلومات فـ بتفضَّل الأعمال الأدبية، أو بتستصعب اللغة الفصحى فـ بتميل للكتب العامية، غالبًا هتلاقي مجموعة قراء مثقفين -هكذا يدَّعون- بيقولوا عليك "محدث قراءة". سيبك منهم، الثقاقة والقراءة مش حكر على حد، واعرف من الليست دي كتب وروايات قيّمة حجمها مش كبير وموضوعاتها مختلفة ومكتوبة بالعامية.
الكتاب للمخرجة المصرية نادية كامل، بتحكي فيه قصة حياة والدتها ماري إيلي روزنتال، المولودة لأب مصري يهودي وأم إيطالية مسيحية، واللي انضمت للتنظيم السري للحركة الشيوعية واتسجنت قبل ما تشتغل صحفية متخصصة في حقوق المرأة. الكاتبة اعتمدت على نقل الكلام نصًا من على لسان والدتها، وأسلوب السرد هيحسسك إنك رجعت لسنة 1930 وعايش جوا القاهرة مع الأجانب وفي بيوتهم.
المولودة "ماري" محظوظة إنها عاشت حياة ثرية ومليئة بالتفاصيل والتجارب بالشكل ده، واحنا محظوظين إن بنتها قررت تكتب الكتاب ده وتشاركنا حياة والدتها.
أحمد العسيلي هو مذيع شاب اتعرف ببرامج إذاعية وتلفزيونية منهم "عسيلي على الكنبة"، كان إعلانه بيطلع فيه "عسيلي" وهو قاعد على الكنبة في الشارع. وده وقتها كان غير معتاد. الحركة دي وغيرها ربطوا "العسيلي" بالشباب، الصلة والعلاقة دي هتحسها وانت بتقرأ كتابه "الكتاب التاني" اللي جمع فيه خواطره والصادر سنة 2011 واللي كتب على غلافه:
"الحياة قد يراها البنى آدم على إنّها امتحان، وهى غالبًا كده فعلًا، بس هى مش كده وبس.. أمّال هي إيه؟ لعبة طبعًا! يعنى زى ما تقولوا كِده امتحان بس فى صورة لِعبَة.. لعبة معقّده جدا بس ممكن تخلّيها بسيطة لو عايز، لو تقدر"
مش شرط تكون بتحب الشعر عشان تبقى سمعت عن أحمد فؤاد نجم، ومش شرط تبقى دودة قراءة عشان تقرأ مذكراته الممتعة جدًا اللي هتعرف فيها كم معلومات كبير جدًا وبطريقة سلسة.
المذكرات ليها جزءين.
الكتاب صدر من حوالي سنتين بس عمل عدد طبعات كبير جدًا رغم إنه العمل الأول للكاتبة، وبتجمع فيه خواطرها. في صفحات معينة هتحس إنه أشبه بالمذكرات لحياة بنت عشرينية بتلف في ساقية "الشغل، العلاقات الاجتماعية المرهقة، علاقتي بعائلتي" وهكذا.
لغته سهلة وصفحاته قليلة، أغلب البنات هيحسوا إنهم كاتبين حاجات كتير جدًا فيه. ولو ولد اللي بيقراه هيفهم أي بنت في حياته أكتر بكتير.
رحلة بيخوضها بطل الرواية في قرية. القرية دي ملبوسة؟ لا أنا ولا أنت ولا الكاتب نفسه تقريبًا كان عارف لحد آخر صفحات في الرواية!
الكاتب شاب، ده أول عمل ليه والوحيد فـ بطبيعة الحال فيه بعض الأخطاء. بس بيثبت إنه خامة كويسة هتضيف للساحة الأدبية روايات رعب تشويقية جدًا.
لو أنت دودة كتب هتخلصها في قعدة، لو لسّه بتقول يا هادي مش هياخد في إيدك 3 أيام.
مانقدرش نقول إنه النسخة العربي من Men Are from Mars, Women Are from Venus، بس هو النسخة المصرية منه. هتلاقي فيه مشاكلك مع صاحبتك ومشاكل خالتك مع جوزها وكل المشاكل اللي ممكن تكون قابلتها بين راجل وست. في أسلوب ساخر، بالظبط زي علاقاتنا.
الكتاب بينتمي لنوعية كتب التنمية البشرية، متقسم فصول وفيه مساحات فاضية كتير بتشجعك الكاتبة فيهم على الإجابة على أسئلة معينة هي هتسألهالك.
خفيف ويخلص في يومين تلاتة، وينفع تفصل بيه بين عملين أتقل.
الكاتب بيقولك "الكتاب ده ليك لو: عمرك ما طلعت الأول، مابتعرفش تاخد قرار ، بتخاف من الكلاب وتتراخم على القطط، بتكره ريحة المستشفيات، قتلت صرصار واستنيت تتفرج النمل يتلم عليه، كنت بتحط على علامة صح شرطة عشان تبان غلط برضه، اتكهربت وأنت صغير. لو أحسن واحد ينصح الناس كلها ويغرق هو ف شبر مية"
صدقه وروح اشتري الكتاب، لذيذ بس هتخلصه وأنت مش متأكد من أي حاجة خالص.
