الاسبوع ده ذكرى ميلاد المخرج محمد خان، الكلام عنه هيفضل مستمر كتير، وكل شوية هتجد زاوية وهتنوَّر حاجة في دماغنا تأكد لنا إنه من أعظم المخرجين اللي عدّوا علينا.

في الليست دي هنتكلم عن لمسته الخاصة مع ممثلات عملوا أدوار فارقة في مشوارهم معاه. فيه منهم اللي أعمالهم التانية كانت كده كده عظيمة، وفيه اللي كان ده دورهم في فيلم "خان" هو الدور الوحيد اللي نصفهم.

1- لانا مشتاق (قبل زحمة الصيف - فتاة المصنع)

هي في الأساس ممثلة ومطربة عراقية كان أول فلم ليها "قبلات مسروقة" سنة 2008، وبعدها بـ  6 سنين اتعاونت مع "خان" في فيلمه "فتاة المصنع" بس كان دورها مش كبير كفاية، أو مش على قد قدراتها.

في 2015 كان ليها نصيب تشارك في آخر فيلم ليه، "قبل زحمة الصيف"، مساحة الدور كانت أكبر وده أظهر موهبتها وتلقائيتها الشديدة، خصوصًا إن معظم مشاهدها كانت مع ممثل تقيل زي "ماجد الكدواني"، فـ المعادلة كانت موزونة والمشاهد كان فيها نجمين تقال وفرق الخبرة بينهم ماكنش باين، والفضل لموهبة "لانا" ومجهود واختيار "خان".

2- عايدة رياض (أحلام هند وكاميليا)

فيلم "أحلام هند وكاميليا إنتاج سنة 1988، واخد المركز الـ  36 فى قائمة أفضل 100 فيلم فى ذاكرة السينما المصرية، وفي أفلام "خان" ترتيبه الـ 13، وبالنسبة لعايدة رياض فـ هو قطعًا مش فيلمها الأول، لكن واحد من أهم أفلامها، كفاية إنه فيلم البطولة الوحيد ليها، وجسدت فيه دور حبيبة أحمد زكي.

تعاون "عايدة" و"خان" استمر وقدمت معاه فيلمه اللي مش معروف كفاية "سوبرماركت"، وبعده فيلم "فارس المدينة"، وفي 2007 لمَّا قرر يعمل "في شقة مصر الجديدة" استعان بيها وقدمها في دور مؤثر في الأحداث على صغر حجمه.

3- نهلة سلامة (الغرقانة - مستر كراتيه)

التسعينات كانت كريمة جدًا على "نهلة". فـ بدأت بدور في "إسكندرية كمان وكمان" مع يوسف شاهين، هو كومبارس صامت، بس برضه دور في ثلاثية "شاهين". وبعدها سنة 1993 اتعاونت مع "خان" في فيلمين، الغرقانة ومستر كراتيه. "هلاله" و"نادية" شخصيتين مالهمش أدنى علاقة ببعض، بس الاتنين أدتهم "نهلة" بطريقة خلِّتها تعلِّم في دماغ الجمهور ويبقى فيلم "مستر كراتيه" هو من أهم النقط اللي بتميزها في مشوارها.

4- منة شلبي (بنات وسط البلد)

زي ما الحظ خدم نهلة سلامة في التسعينات، "منة" كانت محظوظة إن أول فيلم تمثل فيه يبقى من إخراج رضوان الكاشف، وبعد 4 سنين بس من بداية مشوارها تعمل بطولة فيلم من إخراج "خان".

"منة" ماخرجتش عن النمط المعتاد لأدوارها، فـ "ياسمين" كانت بنت بلد وصاحبة جدعة وبتحب كتير بس مشكلتها إن الرجالة مش قابلين شكل حياتها وجراءتها. المختلف هو لمسة "خان" وتأثيره الواضح على أدائها، مافيش زعيق كتير ومافيش تبريق كتير، مشاعرها بتوصل بطريقة سلسة وبسيطة.

5- ميرفت أمين (زوجة رجل مهم)

ميرفت أمين طول عمرها بطلة، بس ايه الفيلم اللي عملته أحسن من "زوجة رجل مهم" ؟ أدائها الاستثنائي وتعبيرات وشها اللي بيدبل تدريجيًا طول أحداث الفيلم، كانوا موجودين في أفلام تانية ولا ده تأثير "خان" ؟

6- ليلى فوزي (ضربة شمس)

 بالنسبالي ليلى فوزي طول عمرها ممثلة "دمها واقف"، ممكن تبقى موهوبة أو مجتهدة، بس دمها واقف وده ماغيرهوش أي مخرج، بالعكس كلهم استعانوا بيها في أدوار الشر تأكيدًا للنقطة دي.

"خان" برضه قدمها في فيلمه "ضربة شمس" كزعيمة العصابة، دورها كانت مسحته بطبيعة الحال مش كبيرة بس مختلفة. لو مابتتقبلش معظم أدوارها، زيي سابقًا، محتاج تتفرج عليها في الفيلم ده.

7- غادة عادل (في شقة مصر الجديدة)

من أول ظهور "غادة" كان ناس كتير بيرجعوا سبب شهرتها لعلاقات جوزها، المنتج مجدي الهواري، وعلاقاته، وإنه بينتج لها الأفلام. وسط جيل طالع فيه نجمات تقيلة زي منى زكي وحنان ترك وبعدهم منة شلبي وهند صبري، كان صعب "غادة" تفضل في نفس المكانة اللي طلعت فيها في أفلام زي "صعيدي في الجامعة الأمريكية".

لكن "خان" راهن عليها وأسند ليها بطولة فيلم "في شقة مصر الجديدة"، ونجحت "غادة" إلى حد كبير في التحدي. وأكدت إنها ممثلة جيدة حتى لو لمت شعرها وماعتمدتش على جمالها الشكلي. بالعكس، مثلت دور البنت الصعيدية المحافظة واللي ماتعرفش ولا عمر حد قالها إنها جميلة.