خد فكرة واشتري بكرة: 7 قنوات يوتيوب عربية لتقييم وترشيح الكتب
الفيديو يكسب الكلام المكتوب، ولمَّا تشوف شخص بيكلمك صوت وصورة أحسن بكتير ما تقعد تقرأ بوست هو كاتبه. وحسب آخر إحصائيات اتنشرت عن منصة "يوتيوب"، ظهر إنها المنصة الأكبر عالميًا في مجالها بعدد زوار تخطى المليار ونص، بيتفرجوا على 30 مليار ساعة شهريًا.
مؤشر القراءة العربي لسنة 2016 من مؤسسة «محمد بن راشد آل مكتوم» للمعرفة، بيقول إن المواطن العربي بيقرأ بمعدل 36 ساعة سنويًا، يعني حوالي 16 كتاب في السنة. النتائج دي اعتمدت على 148 ألف مشارك ومشاركة من الدول العربية كلها، منهم 60 ألف طالب وطالبة، و87 ألف من غير الطلبة المنتمين لشرائح اجتماعية ومهنية مختلفة، وده بيثبت إنه على عكس الشائع، احنا لسه بنقرأ سواء في مجالات أدبية أو علمية.
لو محتار تقرأ إيه، عايز تعرف أكتر عن الكتاب اللي بتفكر تشتريه، مش في دماغك حاجة معينة بس عايز ترشيحات مختلفة، ادخل على قناة من القنوات دي وشوف هتوصل لإيه:
في أقل من 10 دقائق هتسمع نبذة وملخص عن كتاب عالمي، بيقدمه "محمد أسامة" في شكل فيديو كارتون.
سنة 2015 أسس "محمد"، الصيدلي المصري، القناة بهدف تبسيط الكتب العالمية وعرضها في صورة فيديوهات كارتونية قصيرة، وأطلق ليها شعار "كتاب في حكاية". هتلاقي فيديوهات عن كتب زي "سيكولوجية العنف" لكولن ولسون و"الذكاء العاطفي" لدانيال جولمان.
القناة فيها 436,420 متابع بمجموع حوالي 13,682,217 مشاهدة.
في القناة دي فيه تنوع أكبر، هتلاقي فيديو بيتكلم عن رواية "يوتوبيا" وبعده بشوية فيديو تان عن كتاب "The Art of War". "محمود شريف" هو صاحب القناة واللي بيقدم الفيديوهات وبيعد محتواها بنفسه. جت له الفكرة بعد ما قرأ 101 كتاب في تحدي القراءة على موقع "جود ريدز" سنة 2015. القناة بتستخدم في أحيان كتير طريقة الكارتون في عرض الكتب برضه.
القناة فيها 224,709 متابع و3,316,055 مشاهدة.
المختلف في القناة دي إن معظم الكتب فيها أدبية، سواء أدب عربي أو عالمي. وهتلاقي روايات مترجمة لمترجمين مميزين وروايات إنجليزية بترشحهالك "ندى الشبراوي" صاحبة القناة بلغتها الأصلية. القناة بقالها سنة ونص بس، فيها 34,048 متابع لحد دلوقتي و 629,650 مشاهدة.
نوع الحاجات اللي بتقرأها "نضال" مناسب للمراهقين والشباب، وهياخدهم لكتب بمواضيع جديدة غير الشائعة لفئتهم العمرية. عدد المتابعين في القناة 29,878 وعدد المشاهدات 423,451
"محمد" هيمشي مع القراء الجدد في القناة دي خطوة بخطوة، من أول تختار رواية على أساس إيه؟ مرورًا بالروايات البيست سيلير زي "تراب الماس"، لحد الرواية الأعظم على الإطلاق اللي هيقولنا عليها. القناة بدأت من شهور قليلة بس محتواها قوي، فيها 18,321 متابع ووصلت لـ 315,207 مشاهدة.
شاب شامي بيرشح وبيتكلم عن كتب عربية وأجنبية، بلغتها الأصلية ومترجمة. عدد المتابعين في القناة 13,462وعدد المشاهدات 328,669
"رضوى" مراهقة مصرية بترشح قصص وروايات لفئة عمرية قريبة منها. عدد المتابعين لقناتها 4,512 وعدد المشاهدات 64,504
