• اكتب معانا
  • ماتنسناش
  • تابعنا
الموضوع اللي جاي
"بلقيس" أول فنانة تظهر في التليفزيون السعودي من 47 سنة
الموضوع اللي فات
مكافأة مليون جنيه لكل لاعب في منتخب مصر لو صعدنا للدور الـ16 في كأس العالم

7 متاحف في القاهرة غير المتحف المصري لازم تزورهم

القاهرة مليانة انبهارات

زمان زمان أوي، من بتاع 10 سنين كدة لما كانت مدارس المحافظات بتعمل رحلة للقاهرة ب30 جنيه، وبعدها غليت شوية بقت ب40، كانت زيارة المتحف المصري بالتحرير فقرة أساسية في الرحلة. في مرة مشرفين الرحلة حبوا يعملوا تغيير للطلبة، فلغوا زيارة المتحف وحطوا مكانها زيارة قلعة صلاح الدين، وجواها بتزور "متحف الشرطة" و "المتحف الحربي" وده كان أكتر انبهار حصلنا كطلبة. اللي ممكن تعرفه بعد كدة بسهولة، إن القاهرة فيها متاحف تانية كتير وبيتبني فيها حاليًا متاحف تانية، فليه مزنقينها على نفسنا كدة؟ في 7 متاحف متنوعين مهضوم حقهم في العاصمة، احنا هنا هنقوم بدور شرطة المتاحف ونجيب حقهم.

1- المتحف الجيولوجي المصري

سنة 1901 القاهرة بقى فيها متحف فريد من نوعه اسمه المتحف الجيولوجي المصري. احنا بندرس علوم من رابعة ابتدائي وبندرس جيولوجيا في ثانوية عامة، وماعتقدتش إن في حد راح زار المكان ده! رغم إنه مليان انبهارات. المتحف فيه حفريات لحيوانات منقرضة ونيازك من 5000 سنة. يا أخي خد أصحابك وروحوا شوفوا الديناصور اللي كان عايش من قبل ما جدك آدم يتخلق كان عامل ازاي! المتحف ده كان في وسط البلد، بس لما جم يبنوا المترو نقلوه للمعادي. وسواء كان في المعادي أو وسط البلد، فالمتحف هو الأول من نوعه في أفريقيا كلها.

2- متحف جاير أندرسون

ركز في الحكاية، في بيت اسمه بيت الكريدلية، البيت ده كان متكون من جزأين، جزء ملك محمد بن الحاج سالم، وجزء ملك الحاجة آمنة بنت سالم. البيت مبني على الطراز الإسلامي وبيعتبر من الآثار الإسلامية وموجود في حي السيدة زينب جنب مسجد بن طولون. سنة 1935 في ظابط إنجليزي عايش في مصر وبيحبها اسمه جاير أندرسون عمل ديل لطيف مع هيئة الآثار المصرية، قالهم سيبولي البيت أسكن فيه وأنا هحافظ على تراثه الأثري وشكله وهحط فيه كل التحف والمقتنيات والكنزو اللي جمعتها واللي هجمعها، ولما أموت أو أسيب مصر بشكل نهائي هتبقى الليلة دي كلها ملكية عامة للشعب المصري.  ده اللي حصل فعلًا، ودلوقتي البيت موجود بتراثه وعمارته وكل التحف والكنوز اللي جواه، وأنت لو مهتم كنت روحت زورته.

3- متحف محمد علي في المنيل

شوفت مسلسل الملك فاروق؟ كان ابن عم الملك فاروق اسمه محمد علي ولعب دوره لطفي لبيب، كان هو ولي عهد الملك فاروق لحد ما خلف ابنه أحمد فؤاد. كل ده مش مهم، المهم إن محمد علي بنى قصر عظيم جدًا في منطقة المنيل، قعد يبني فيه 30 سنة وخلصه سنة 1929. القصر بيجمع ما بين الطراز الإسلامي في العمارة والفن الأوروبي. أنا روحت زورت القصر ده بنفسي وبنصحك بيه وبقولك إنه مكان مناسب للسيلفي وفيه شوية تحف وكنوز لطيفة وفرش مصروف عليه وتذكرته كانت ب2 جنيه باين، أعتقد بعد التعويم بقت التذكرة ب20 جنيه مثلًا، بس هو يستاهل وفيه قاعات مختلفة وكل قاعة فيها حاجة مميزة. روح زوره بقى أشوقك تاني ازاي أكتر من كدة؟

4- متحف أحمد شوقي

أحمد بيه شوقي كان ساكن في المطرية قبل التكاتك ما تسكنها، حصلتله مشاكل واتنفى وكتب قصيدة "غربة وحنين" اللي بتجيلنا في ثانوية عامة إجباري. بعد ما رجع من المنفى قرر يبني بيت لنفسه في الجيزة، البيت ده بقى متحف ليه بعد وفاته. المكان فيه حاجات لطيفة هتتبسط لما تشوفها، عندك مثلا كل مقتنيات شوقي وأعمال بخط إيديه والمكتبة بتاعته. في كمان جناح خاص بالموسيقار محمد عبد الوهاب. عبد الوهاب كان أحد اكتشافات شوقي وأقام فترة في البيت بتاعه، وهتلاقي هناك مقتنيات وأوضة عبد الوهاب ومكتبة سمعية فيها أعمال بصوت عبد الوهاب غناها في حضور أمير الشعراء.

5- المتحف الحربي

المكان ده عظيم، موجود جوّه قلعة صلاح الدين الأيوبي. بداية المتحف كان في شارع الفلكي وبعدين راح جاردن سيتي وبعدين اتحرك لمكانه الحالي في القلعة سنة 1949. المتحف متقسم ل11 جزء، لما تدخله هتبقى مش عاوز تخرج أو ممكن تتوه، بس مش دايمًا بتبقى كل الأقسام مفتوحة. هناك هتلاقي كل حاجة عن الجيش والقوات المصرية من العصور الفرعونية لحد دلوقتي، مرورًا بالعصور الإسلامية ومحمد علي والخمسينات والسيتنات. أسلحة وملابس وقاعة للشهداء وطيارات وسيوف ودروع، فيه كمان سيف منسوب للنبي محمد عليه الصلاة والسلام.

6- المتحف الزراعي

المتحف ده منسي رغم إنه من أجمل المتاحف في القاهرة وفي مصر كلها. تاريخه بيرجع لسنة 1930 وده بيخليه تاني متحف زراعي في العالم كله، وعمله الملك فؤاد الأول، الراجل كان عاوز يحافظ على تاريخ مصر الزراعي وكدة. لو عاوز تعمل زيارة هتلاقيه في الدقي، وهتلاقي جواه نباتات نادرة وفي منها اللي انقرض أساسًا، وحيوانات حقيقية متحنطة وأدوات زراعية من آلاف السنين. المتحف متقسم ل8 متاحف صغيرة: متحف الزراعة المصرية القديمة، ومتحف للنماذج العلمية، ومتحف للثروة النباتية، ومتحف سوريا، والمتحف اليوناني والروماني والقبطية والإسلامية ومتحف القطن. القاعة الرئيسية هي اللي فيها التماثيل المتحنطة وتماثيل لبني آدمين غالبًا هتتخض منهم وتفتكرهم بجد.

7- متحف أم كلثوم

ياريت والله تروح تزور متحف أم كلثوم وتقرالها الفاتحة كدة، خصوصًا لو بتشقط بأغانيها أو بتشغل أغانيها بالليل وتقعد تسرح وتفكر، يبقى الست ليها عليك حق الزيارة. المتحف في المنيل، أكتر حاجة مميزة فيه هي ملابس أم كلثوم، المناديل والفساتين والجزم. كمان هتلاقي القصايد اللي الشعرا كانوا بيقدموها للست، موجودة بخط إيديهم، وهتلاقي الجواب المشهور اللي بعته القصبجي لسومة واللي بيلموا بيه لايكات ع السوشيال ميديا، روح أنت بقى صوره ولم لايكات أنت كمان، أو انسى حوار اللايكات وروح اتبسط. 

Home
خروجات النهاردة
Home
Home