كل حد فينا عنده مطربه المفضل، سواء من أيام زمان أو دلوقتي، ولكل مطرب بتحبه بتكون في أغنية معينة أنت متعلق بيها وبتحبها منه هو بس، لكن زي ما كل حقيقة ليها وشين، كمان في أغاني ليها وشين، بمعنى إن في أغاني من اللي اتشهرت وحبيناها بصوت مطربين معينين، ممكن يكونوا مش هما أول حد غناها، لأسباب زي إنها تكون في الأصل لمطرب تاني وأعيد إنتاجها من جديد أو اتنقلت بشكل أو بآخر من مغني للتاني. في الليست دي هنعرفك على المطربين الأصليين لـ 7 أغاني مشهورة حبيناها

سلمتك بيد الله

صدرت لجورج وسوف في ألبوم "اوعديني" سنة 1983 وحققت نجاح كبير وقتها، بعدها بـ 8 سنين صدرت مرة تانية بنفس اللحن والكلمات بس المرة دي بصوت كاظم الساهر، ضمن أغاني ألبوم "العزيز" سنة 1991. الأغنية من كلمات عزيز الرسام وألحان كاظم الساهر

اسمعها هنا بصوت جورج وسوف

كليب الأغنية لكاظم الساهر

ميال

الأغنية المشهورة جدًا لعمرو دياب من كلمات مجدي النجار وألحان حجاج عبد الرحمن، كانت في البداية من نصيب محمد محيي لكن بسبب خلافات مع الشركة المنتجة، كانت الأغنية في الآخر من نصيب عمرو دياب ضمن ألبوم بنفس الأسم وحققت نجاح ضخم جدا وقت نزولها

الدنيا دي صغيرة

غناها في البداية تامر حسني في  2006 ضمن الأغاني اللي كانت بتنزله بشكل منفرد "سينجل" وقت ما كان بيأدي الخدمة العسكرية، لكنها ماحققتش انتشار كبير، وطرحها مرة تانية صابر الرباعي في ألبوم "أجمل نساء الدنيا" في 2006. الأغنية من كلمات محمود صلاح وألحان صلاح البجيرمي وتوزيع عصام الشرايطي

بصوت تامر حسني

بصوت صابر الرباعي

والله ما تحدي "أنا بس بتضايق"

نزلت "سينجل" لتامر حسني في نفس ظروف صدور أغنية "الدنيا دي صغيرة" ونزلتها أصالة في نفس السنة  ضمن ألبوم "حياتي" وانتشرت انتشار كبير وياما سمعنا ميكسات بين الأغنيتين، لدرجة إن وقت نزول الأغنية في 2006 معظم الناس كانوا مصرين إن الأغنية نزلت دويتو بين أصالة وتامر حسني. الأغنية من كلمات هاني عبد الكريم  وألحان وليد سعد

نسخة تامر حسني

نسخة أصالة

ابعد عني

أغنية تانية لكاظم الساهر من ألحانه وكلمات عزيز الرسام، صدرت لأول مرة في واحدة من حلقات مسلسل "المسافر" اللي قام ببطولته "الساهر" سنة 1993 وهي التجربة التمثيلية الوحيدة له، وبعد كده ضمها لألبوم "رحال" اللي صدر في نفس السنة. غنيتها مرة تانية وأصدرتها فيديو كليب المطربة غادة رجب سنة 1996

الأغنية لكاظم الساهر

الأغنية لغادة رجب

روح قلبي

نزلت كـ "سينجل" للهضبة في 2001، لكن بعدها بفترة وفي 2007 نزلت باسم "آن الأوان" في ألبوم محمد حماقي خلينا نعيش، الأغنية من كلمات خالد تاج الدين وألحان عمرو مصطفى، وغناها حماقي بتوزيع مختلف شوية عن نسخة عمرو دياب

عمرو دياب

محمد حماقي

يا ناسي وعدك

أغنية كمان للهضبة من كلمات عبير الرزاز وألحان تامر علي، غنى عمرو دياب يا ناسي وعدك سنة 2004 وبعدها في 2007 غناها وسجلها مرة تانية أحمد سعد وطرحها بنفس الأسم كسينجل بنفس اللحن والتوزيع. في رواية بتقول إن أحمد سعد هو اللي غناها الأول لكن أحمد سعد في حوار مع موقع "في الفن" في 2007، قال إن بعد صدور الأغنية عرف إنها اتغنت فبل كده، وعشان كده فضلت سينجل وماتمش ضمها لألبومه "أحمد سعد 2007"

بصوت أحمد سعد